2025 جىلى قىتايدا 13,35 ميلليون تالاپكەر "گاوكاو" دەپ اتالاتىن ۇلتتىق جوعارى وقۋ ورىندارىنا قابىلداۋ ەمتيحاندارىن تاپسىرادى. بۇل تۋرالى سارسەنبى كۇنى قحر ءبىلىم مينيسترلىگى مالىمدەگەن، دەپ حابارلايدى "ادىرنا" ۇلتتىق پورتالى.
اتالعان كورسەتكىش بىلتىرعى رەكوردتىق 13,42 ميلليونمەن سالىستىرعاندا ءسال تومەندەگەن.
ءبىلىم مينيسترلىگى وڭىرلەرگە ەمتيحاندى ءتيىستى دەڭگەيدە وتكىزۋگە جانە تالاپكەرلەرگە بارلىق قاجەتتى قىزمەت تۇرلەرىن ۇسىنۋعا قولداۋ كورسەتۋگە دايىن ەكەنىن مالىمدەدى.
ەمتيحانمەن بايلانىستى زاڭسىز ارەكەتتەردىڭ الدىن الۋ ماقساتىندا ەل كولەمىندە ارنايى وپەراتسيالار جۇرگىزىلۋدە. بۇل شارالار ەمتيحان ورتاسىن ونلاين جانە وفلاين تۇردە تازارتۋعا، سونداي-اق ءارتۇرلى الاياقتىق فورمالارىمەن كۇرەسۋگە باعىتتالعان.
ەمتيحان تاپسىرۋ ورىندارىنا تەك قاۋىپسىزدىك تالاپتارىنا قاتاڭ تەكسەرىستەن وتكەننەن كەيىن عانا كىرۋگە بولادى. مۇنداي تەكسەرىستەر، اسىرەسە، تىيىم سالىنعان زاتتاردى – ۇيالى تەلەفوندار، اقىلدى ساعاتتار مەن كوزىلدىرىكتەردى – انىقتاۋعا باعىتتالعان.
ءبىلىم مينيسترلىگى اسىرەسە وسال توپتارعا ەرەكشە كوڭىل ءبولۋدى تالاپ ەتتى. مىسالى، 12 وڭىردە كورۋ قابىلەتى بۇزىلعان 16 تالاپكەرگە ارنالعان برايل جۇيەسىمەن باسىلعان ەمتيحان پاراقتارى دايىندالعان. سونىمەن قاتار، مۇمكىندىگى شەكتەۋلى 14 مىڭنان استام تالاپكەردىڭ ەمتيحانعا قاتىسۋىنا جاعداي جاسالعان.
بۇدان بولەك، بارلىق تالاپكەرلەرگە ارنايى پسيحولوگيالىق كەڭەس الۋ مۇمكىندىگى بەرىلگەن.
جوعارى باسەكەلەستىكپەن وتەتىن "گاوكاو" ەمتيحانى قىتاي جاستارى ءۇشىن ومىرلىك ماڭىزدى سانالاتىن كەزەڭ. بۇل ەمتيحاننان جاقسى ناتيجە الۋ – تەك جوعارى وقۋ ورنىنا تۇسۋگە عانا ەمەس، بولاشاق مانساپقا دا تىكەلەي اسەر ەتەدى.
