قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆ ءماجىلىستىڭ جالپى وتىرىسىنان كەيىن نازارباەۆ قورىنىڭ نە سەبەپتى اقشانى جىلىستاتۋ مونيتورينگىنە ىلىكپەگەنىن ءتۇسىندىردى.
ءماجىلىس ءبىرىنشى وقىلىمدا ماقۇلداعان زاڭ جوباسىندا زاڭسىز جولمەن الىنعان قارجىنى جىلىستاتۋعا قارسى باقىلاۋ جۇرگىزىلەتىن ۇيىمداردىڭ ءتىزىمى كورسەتىلگەن. الايدا بۇل تىزىمدە ەنداۋمەنت قورلار مەن نۇرسۇلتان نازارباەۆ قورى جوق.
"قارجىلىق مونيتورينگ سۋبەكتىسى رەتىندە تىركەلۋدىڭ ءوزى نە بەرەدى؟ نازارباەۆ قورىنا قارجى قايدان تۇسەدى؟ قارجى ۇيىمدارىنان، ياعني بانكتەر مەن تولەم ۇيىمدارىنان تۇسەدى. ال بۇل ۇيىمدار ونسىز دا قارجىلىق مونيتورينگ سۋبەكتىلەرى بولىپ سانالادى. ءبىز ولارعا ارنايى كريتەريلەر بويىنشا باقىلاۋ جۇرگىزەمىز. ەگەر قور بانكتەن اقشا السا، ول اقشا زاڭدى ما، جوق پا - سونى كورىپ وتىرامىز. كۇمان تۋىنداسا، بىزگە حابارلاما تۇسەدى، ءارى قاراي ونى تالدايمىز، — دەدى جەڭىس ەلەمەسوۆ.
جۋرناليست “بۇل جاۋاپتان قارجىلىق مونيتورينگ اگەنتتىگى نازارباەۆ قورىن كۇدىك تۋدىراتىن ۇيىم رەتىندە قاراستىرمايدى دەپ تۇسىنۋگە بولا ما؟” دەپ ناقتىلاعان كەزدە، ەلەمەسوۆ:
ء"يا", - دەپ قىسقا جاۋاپ بەردى.
ايتا كەتەيىك، ءماجىلىس دەپۋتاتى باقىتجان بازاربەك زاڭ جوباسىنداعى بۇل ولقىلىققا الاڭداۋشىلىق ءبىلدىرىپ، Astana Hub, «قازاقستان حالقىنا» قوعامدىق قورى، «جاسىل دامۋ» اكتسيونەرلىك قوعامى سياقتى ۇيىمداردىڭ دا قارجىلىق مونيتورينگتەن تىس قالىپ جاتقانىن سىنعا الدى.
