Qarjylyq monitoring agenttıgı töraǧasynyŋ orynbasary Jeŋıs Elemesov Mäjılıstıŋ jalpy otyrysynan keiın Nazarbaev qorynyŋ ne sebeptı aqşany jylystatu monitoringıne ılıkpegenın tüsındırdı.
Mäjılıs bırınşı oqylymda maqūldaǧan zaŋ jobasynda zaŋsyz jolmen alynǧan qarjyny jylystatuǧa qarsy baqylau jürgızıletın ūiymdardyŋ tızımı körsetılgen. Alaida būl tızımde endaument qorlar men Nūrsūltan Nazarbaev qory joq.
"Qarjylyq monitoring subektısı retınde tırkeludıŋ özı ne beredı? Nazarbaev qoryna qarjy qaidan tüsedı? Qarjy ūiymdarynan, iaǧni bankter men tölem ūiymdarynan tüsedı. Al būl ūiymdar onsyz da Qarjylyq monitoring subektılerı bolyp sanalady. Bız olarǧa arnaiy kriteriiler boiynşa baqylau jürgızemız. Eger qor bankten aqşa alsa, ol aqşa zaŋdy ma, joq pa - sony körıp otyramyz. Kümän tuyndasa, bızge habarlama tüsedı, ärı qarai ony taldaimyz, — dedı Jeŋıs Elemesov.
Jurnalist “Būl jauaptan Qarjylyq monitoring agenttıgı Nazarbaev qoryn küdık tudyratyn ūiym retınde qarastyrmaidy dep tüsınuge bola ma?” dep naqtylaǧan kezde, Elemesov:
"İä", - dep qysqa jauap berdı.
Aita keteiık, Mäjılıs deputaty Baqytjan Bazarbek zaŋ jobasyndaǧy būl olqylyqqa alaŋdauşylyq bıldırıp, Astana Hub, «Qazaqstan halqyna» qoǧamdyq qory, «Jasyl damu» aksionerlık qoǧamy siiaqty ūiymdardyŋ da qarjylyq monitoringten tys qalyp jatqanyn synǧa aldy.
