ەلوردادا مەملەكەت باسشىسى قاسىم-جومارت توقاەۆتىڭ قاتىسۋىمەن استانا حالىقارالىق فورۋمى باستالدى، دەپ حابارلايدى “ادىرنا” ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
فورۋمنىڭ پلەنارلىق وتىرىسىندا سويلەگەن سوزىندە پرەزيدەنت جاھاندىق قاۋىپسىزدىك، بەيبىتشىلىك پەن ىنتىماقتاستىق ماسەلەلەرىن قوزعادى.
«بارشاڭىزبەن استانا حالىقارالىق فورۋمىندا جۇزدەسكەنىمە قۋانىشتىمىن! بۇگىنگى باسقوسۋعا شەتەل ۇكىمەتتەرىنىڭ باسشىلارى، ديپلوماتيا، بيزنەس جانە اكادەميالىق ورتاداعى دوستارىمىز بەن ارىپتەستەرىمىز قاتىسىپ وتىر. مارتەبەلى مەيماندارىمىزعا، اتاپ ايتقاندا، رۋاندا پرەزيدەنتى پول كاگامەگە جانە سولتۇستىك ماكەدونيا پرەزيدەنتى گوردانا سيليانوۆسكا-داۆكوۆاعا، ەۋروپا كەڭەسىنىڭ باس حاتشىسى الەن بەرسەگە، بۇۇ-نىڭ بۇرىنعى باس حاتشىسى پان گي مۋنعا، بىرىككەن ۇلتتار ۇيىمى جۇيەسىنىڭ جەتەكشىلەرىنە، فورۋمنىڭ وزگە دە قاتىسۋشىلارىنا شىنايى ريزاشىلىعىمدى بىلدىرەمىن»، – دەدى قاسىم-جومارت توقاەۆ.
مەملەكەت باسشىسى قازىرگى ۋاقىتتا الەمدە سوعىس پەن قاقتىعىستاردىڭ ءورشىپ بارا جاتقانىن اتاپ ءوتتى.
«دۇنيە ءجۇزىن قاقتىعىستار مەن سوعىس ءورتى جايلاپ بارادى. بىلتىرعى مالىمەتكە سايكەس، 52 مەملەكەت قارۋلى قاقتىعىس جاعدايىندا تۇرعان. ال وسىنداي قاتىگەز ارەكەتتەردەن كەلگەن ەكونوميكالىق شىعىن 19 تريلليون دوللارعا جەتتى. بۇل، شامامەن، الەمدىك ءىجو-ءنىڭ 13,5 پايىزى»، – دەدى پرەزيدەنت.
ونىڭ ايتۋىنشا، بۇل سانداردىڭ ار جاعىندا ودان دا قورقىنىشتى احۋال جاتىر.
«قازىرگى قاقتىعىستار اناعۇرلىم ۇزاق ءارى كۇردەلى سيپاتقا يە. وعان كوپتەگەن «ويىنشىلار»، ءتىپتى، ەشقانداي مەملەكەتكە قاتىسى جوق توپتار ارالاسادى. مۇنداي قاقتىعىستاردىڭ تامىرىندا ءتۇرلى قايشىلىقتار جاتىر»، – دەدى ول.
پرەزيدەنت الەمدەگى شيەلەنىستەردىڭ جاساندى ينتەللەكتتىڭ دامۋىمەن مۇلدەم ۇيلەسپەيتىنىن ايتىپ، تاريحي ارازدىقتارعا سۇيەنگەن سوعىستاردىڭ اقىلعا قونبايتىنىن جەتكىزدى.
«سوعىسۋدىڭ ورنىنا ءبىز حالقىمىزدى، اسىرەسە، جاستارىمىزدى سانالى ءارى وركەنيەتتى قوعام قۇرۋعا ۇندەۋىمىز كەرەك»، – دەدى مەملەكەت باسشىسى.
سونىمەن قاتار، قاسىم-جومارت توقاەۆ يادرولىق قارۋى بار مەملەكەتتەر اراسىنداعى شيەلەنىستەرگە ەرەكشە نازار اۋدارۋ قاجەتتىگىن اتاپ ءوتتى.
ۇقساس جاڭالىقتار
