اسىرەۇلتشىلدىققا جول جوق. ءار حالىقتىڭ ءوز انا تىلىندە سويلەۋگە قۇقىعى بار – پرەزيدەنت توقاەۆ

مەملەكەت باسشىسى قاسىم-جومارت توقاەۆ استانا حالىقارالىق فورۋمىنىڭ پلەنارلىق وتىرىسىندا سويلەگەن سوزىندە قازىرگى كۇردەلى گەوساياسي جاعدايدا قازاقستان ۇستاناتىن نەگىزگى ۇستانىمدارعا توقتالدى، دەپ حابارلايدى "ادىرنا" ۇلتتىق پورتالى. پرەزيدەنت جاھاندىق قاۋىپسىزدىككە ءتونىپ تۇرعان قاتەرگە تەك گەوساياسي تۇرعىدان عانا ەمەس، كەشەندى تۇردە قاراۋ قاجەت ەكەنىن ايتتى. «الەمدەگى احۋال قاۋىپتى جاعدايدا تۇر. مۋلتيلاتەراليزمنىڭ ءۇنى باسەڭدەگەن تۇستا، پروتەكتسيونيزم كۇشەيىپ بارادى. مۇنداي بەي-بەرەكەت كەزەڭدە ءبىزدىڭ مىندەتىمىز – ىنتىماقتى ساقتاپ، ىدىراعان جەردى قالپىنا كەلتىرۋ»، – دەدى توقاەۆ. پرەزيدەنت ءوز سوزىندە قازاقستاننىڭ سىرتقى ساياساتىنا توقتالىپ، مەملەكەتىمىز ارقاشان بەيبىت ديالوگ پەن ءوزارا قۇرمەتكە نەگىزدەلگەن ىقپالداستىقتى قولدايتىنىن اتاپ ءوتتى. سونىمەن قاتار، ەل ىشىندە ۇلتارالىق كەلىسىم مەن مادەني ارالۋاندىقتى ساقتاۋ – باستى باسىمدىقتاردىڭ ءبىرى ەكەنىن جەتكىزدى. «اسىرەۇلتشىلدىققا جول جوق. وزگە ۇلتتاردىڭ تاريحى مەن مادەني ءداستۇرىن مەنسىنبەۋشىلىككە توسقاۋىل قويىلادى. ءار حالىقتىڭ ءوز انا تىلىندە سويلەۋگە، ءتول مادەنيەتىن ساقتاپ، دامىتۋعا تولىق قۇقىعى بار. سوندىقتان قازاقستاندا "بىرلىگىمىز – ارالۋاندىقتا" دەگەن قاعيداتتى قاتاڭ ۇستانامىز»، – دەدى مەملەكەت باسشىسى.