يندونەزيانىڭ باتىس ياۆا پروۆينتسياسىنداعى اكتاستى كارەردە بولعان كوشكىن سالدارىنان 14 ادام قازا تاپتى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
يندونەزيانىڭ ۇلتتىق ىزدەستىرۋ-قۇتقارۋ اگەنتتىگى قايعىلى وقيعانىڭ 30 مامىر كۇنى چيرەبون اۋدانىندا تىركەلگەنىن حابارلاعان. ەل قۇتقارۋشىلارى ءۇيىندى استىنان 14 ادامنىڭ ءمايىتىن شىعاردى. وقيعا سالدارىنان ودان بولەك 12 ادام جاراقات العانى ءمالىم بولدى.
بيلىك وكىلدەرى ءۇيىندىنىڭ استىندا ءالى 6-8 ادامنىڭ قالۋى مۇمكىن ەكەنىن ەسكەرتتى. قۇتقارۋ جۇمىستارىنا پوليتسيا مەن اسكەريلەر، ەرىكتىلەر جۇمىلدىرىلعان. قازىرگى ۋاقىتتا بەس
ەكسكاۆاتور وقيعا ورنىندا جۇمىس ىستەپ جاتىر.
باتىس ياۆا گۋبەرناتورى دەدي مۋليادي الەۋمەتتىك جەلىدە وسى كارەرگە اقپان ايىندا بارعانىن جانە قاۋىپسىزدىك تالاپتارىنىڭ ساقتالماعانىن سول كەزدە-اق بايقاعانىن جازدى. قايعىلى وقيعادان كەيىن گۋبەرناتور بۇل كارەردىڭ جانە پروۆينتسياداعى تاعى ءتورت ۇقساس كاسىپورىننىڭ جۇمىسىن توقتاتقانىن مالىمدەدى.
يندونەزيادا زاڭسىز شاحتالار مەن كارەرلەر كەڭ تارالعان. 2024 جىلى سۋماترا ارالىنداعى زاڭسىز التىن ءوندىرۋ شاحتاسىندا كوشكىن بولىپ، كەمىندە 15 ادام كوز جۇمعان بولاتىن.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز