الماتىدا ساتپاەۆ كوشەسىندەگى قۇرىلىس الاڭىندا مۇنارالى كران قۇلاپ، ءبىر جۇمىسشى قازا تاپتى، دەپ حابارلايدى "ادىرنا" ۇلتتىق پورتالى.
الماتى قالالىق پوليتسيا دەپارتامەنتىنىڭ مالىمەتىنشە، توتەنشە جاعداي 3 ماۋسىم كۇنى ساعات 16:00 شاماسىندا بولعان.
قۇرىلىس جۇمىستارى بارىسىندا مۇنارالى كران اۋدارىلىپ كەتكەن.
«وقيعا سالدارىنان كران وپەراتورى قازا تاپتى. اتالعان فاكت بويىنشا بوستاندىق اۋدانى پوليتسيا باسقارماسىنا قاراستى پوليتسيا بولىمىندە قىلمىستىق ءىس قوزعالدى. قازىرگى تاڭدا وزگە دە ءمان-جايلار انىقتالۋدا»، – دەپ مالىمدەدى ۆەدومستۆو.
قازا تاپقان ەر ادام 61 جاستا بولعان. ول كرانشى بولىپ 15 جىل جۇمىس ىستەگەن. ارتىندا جارى مەن ەكى بالاسى قالدى. قازىر قازا تاپقان كرانشىنىڭ تۋىستارى وقيعانىڭ قالاي بولعانىن انىقتاۋعا تىرىسىپ جاتىر. ولاردىڭ ايتۋىنشا، قۇرىلىس باسشىلىعى تۋىستارىمەن بايلانىسقا شىقپاعان.
«كەشە كەشكى ساعات 18:30-دا بوستاندىق اۋدانىنىڭ پوليتسياسىنان قوڭىراۋ شالىپ، كوكەمنىڭ قۇرىلىس الاڭىندا قازا تاپقانىن ايتتى. كران قۇلاعان. بىراق كران قالاي قۇلادى، نە بولدى – ەشكىم ايتپاي وتىر. ءبىز بۇگىن سول قۇرىلىس الاڭىنا باردىق، بىراق ىشكە كىرگىزبەدى. باسقارۋشى ديرەكتورعا قوڭىراۋ شالدىق – ول دا ەشتەڭە ايتپادى. ۇيىم باسشىلىعى بايلانىسقا شىقپاي جاتىر. ءبارى جاسىرىن. ءبىز تەرگەۋدىڭ اشىق جۇرگىزىلۋىن تالاپ ەتەمىز»، – دەيدى مارقۇمنىڭ تۋىسى.
ونىڭ ايتۋىنشا مارقۇمنىڭ ءمايىتى ءالى تۋىستارىنا بەرىلمەگەن. قازىرگى ۋاقىتتا قۇرىلىس الاڭى مورلەنگەن.
