سولتۇستىك قازاقستان وبلىسىندا ورتالىق ازياداعى ەڭ ءىرى ءسۇت فەرماسى سالىنىپ جاتىر. بۇل تۋرالى 5 ماۋسىمدا اۋىل شارۋاشىلىعى مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«ءسۇتتى مال شارۋاشىلىعى سالاسىنداعى اۋقىمدى ينۆەستيتسيالىق جوبانى «زەنچەنكو ي ك» سەنىم سەرىكتەستىگى 2024 جىلدان باستاپ قىزىلجار اۋدانىنىڭ نوۆونيكولسكوە اۋىلىندا ىسكە اسىرۋدا. 8000 باس ءىرى قارا مالعا ارنالعان كەشەننىڭ قۇنى 9 ملرد تەڭگەنى قۇرايدى.
بۇل ءسۇت كەشەنى قازاقستاندا عانا ەمەس، بۇكىل ورتالىق ازيادا ەڭ ءىرى كەشەن بولماق. تولىق قۋاتىندا ول جىل سايىن شامامەن 26 000 توننا ءسۇت وندىرەتىن بولادى»،—دەلىنگەن حابارلامادا.
كەشەننىڭ جوبالىق قۇرىلىمىنا 7 عيمارات كىرەدى، ولاردىڭ ىشىندە ارقايسىسى 1280 باسقا ارنالعان 3 سيىر قوراسى بار. كەشەننىڭ ەرەكشەلىگى – ءبىر ۋاقىتتا 90 باس ءىرى قارانى ساۋاتىن جوعارى تەحنولوگيالى «كارۋسەل» ءتيپتى ساۋ قوندىرعىسىنىڭ بولۋى. بۇل ساعات سايىن 700 باسقا دەيىن قىزمەت كورسەتۋگە مۇمكىندىك بەرىپ، ءوندىرىس ۇدەرىسىنىڭ جوعارى تيىمدىلىگىن قامتاماسىز ەتەدى.
ايتا كەتەيىك، سولتۇستىك قازاقستان وبلىسى ءسۇت ءوندىرىسى سالاسىندا تۇراقتى ءوسىم كورسەتىپ كەلەدى. 2023 جىلى جالپى سانى 11 000 باستان اساتىن ىقم-عا ارنالعان 19 جوبا قارجىلاندىرىلىپ، ولاردىڭ قۋاتى جىلىنا 70 000 توننا ءسۇت وندىرۋگە جەتتى.
