سۋديا ەرجان جانۇزاقوۆ 16 جاستاعى شەرزات پولاتتى ءولتىردى دەپ ايىپتالعان 9 سوتتالۋشىعا شىققان ۇكىمدى ءتۇسىندىردى، دەپ حابارلايدى «ادىرنا» ءتىلشىسى.
ايتۋىنشا، سوت دالەلدەردى زەرتتەپ، سوتتالۋشىلاردىڭ تاعىلعان ايىپ بويىنشا كىنالارى تولىق دالەلدەنگەن دەگەن تۇجىرىمعا كەلگەن.
«جابىرلەنۋشىلەردىڭ، كۋالاردىڭ ايعاقتارى، وقيعا ورنىنان الىنعان بەينەجازبالار بار، زاتتاي دالەلدەمەلەر الىنعان، قاجەتتى ساراپتامالاردىڭ بارلىعى وتكىزىلگەن. ولاردىڭ شىنايىلىعىندا كۇمان جوق. بۇل دالەلدەمەلەر سوتتالۋشىلاردىڭ ارقايسىنىڭ ارەكەتىن ايقىن انىقتاۋعا مۇمكىندىك بەرەدى. شىناسىلدىڭ ناقتى شەرزات پولاتقا، ونىڭ ولىمىنە الىپ كەلگەن پىشاق جاراقاتىن كەلتىرگەنى، مەديتسينالىق-كريميناليستىك ساراپتاما قورىتىندىسىمەن بەكىتىلگەن. ساراپتاما شىناسىلدان الىنعان پىشاقپەن (پىشاق ءجۇزىنىڭ سيپاتتاماسىمەن) جاراقات كەلتىرىلگەنىن كورسەتتى. پىشاق، شىناسىل كورسەتكەن جەردەن، ورمان القابىنان الىنعان. تەرگەۋ كەزىندە شىناسىل كىناسىن مويىنداپ ايعاق بەرگەن»،—دەدى ول.
سۋديا باسقا سوتتالۋشىلاردىڭ ارەكەتتەرى سالدارىنان شەرزات پولاتقا جەڭىل دارەجەلى زيان كەلتىرىلگەنىن مالىمدەدى. بۇل دا ساراپتاما قورىتىندىسىمەن راستالعان. بۇل دا ساراپتاما قورىتىندىسىمەن راستالعان.
«زاڭ بويىنشا ادام ءولتىرۋدى ادامدار توبىمەن جاسالعان دەپ، ەگەر ول ەكى نەمەسە ودان دا كوپ تۇلعالاردىڭ بىرلەسىپ جاساعان ارەكەتتەرىمەن جاسالعان كەزدە تانىلادى. جوعارىدا ايتقانىمداي، ءولىمنىڭ سەبەبى ءبىر پىشاق سوققىسىنان بولعان جانە ونى شىناسىل جاساعان. سايكەسىنشە، ول ادام ءولتىرۋ بويىنشا كىنالى دەپ تانىلعان»،— دەپ ءتۇسىندىردى جانۇزاقوۆ.
سۋديانىڭ سوزىنشە، بۇزاقىلىق زاڭ بويىنشا بارىنشا ارسىزدىقپەن ەرەكشەلەنەتiن، كۇش قولدانۋمەن، سونىڭ ىشىندە جەڭىل دارەجەلى دەنساۋلىققا زيان كەلتىرۋمەن ۇشتاسقان، قوعامدىق ءتارتىپتى اسا قاتىگەزدىكپەن بۇزۋ بولىپ تانىلادى.
«سوندىقتان جابىرلەنۋشىلەردىڭ دەنساۋلىعىنا، سونىڭ ىشىندە پولاتتىڭ، جەڭىل دارەجەلى زيان كەلتىرگەن سوتتالۋشىلاردىڭ ارەكەتتەرى بۇزاقىلىق رەتىندە سارالانعان. شەرزات پولاتقا سوققىلار كەلتىرگەن بەلعوجاەۆ پەن ءىلياسوۆتىڭ قولدارىندا پىشاق جانە وقتالعان مىلتىق بولعانىن ەسكەرۋ قاجەت، ياعني ولار جابىرلەنۋشىنى سول پىشاقتىڭ جۇزىمەن ۇرىپ جانە مىلتىقپەن اتۋعا مۇمكىنشىلىكتەرى بولعان، بىراق ولار پىشاقتىڭ سابىمەن جانە مىلتىقتىڭ تۇبىمەن ۇرعان. جازا تاعايىنداۋ كەزىندە سوت قك-ءنىڭ 53-بابىندا قارالعان جەڭىلدەتەتىن ءمان-جايلاردى تەك ازامات جانە نۇربول توقتاۋباەۆتاردا، قالياحمەتتە (جاس بالالارىنىڭ بولۋىن) جانە ىسقاقتىڭ كامەلەتكە تولماعانىن ەسكەردى. سونداي اق بارلىق سوتتالۋشى، كامەلەتكە تولماعانننا باسقا، اۋىرلاتاتىن ءمان-جاي رەتىندە الكوگولدەن ماساڭ كۇيدە بولۋى تانىلعان. سونىمەن قاتار سوت سوتتالۋشىلاردىڭ جەكە باسىن، ولاردىڭ ءبىر بولىگىنىڭ بۇرىن سوتتى بولعاندارىن ەسكەردى. اتاپ ايتقاندا، ازامات توقتاۋباەۆ پەن نۇرقياس ىلياسوۆكە بۇرىنعى سوتتىلىقتارىنىڭ وتەلمەگەن جازالارىن ەسكەرىپ، 15 جانە 9 جىلعا باس بوستاندىعىنان ايىرۋ جازاسى تاعايىندالدى. بۇل مەرزىمدەر، جوعارعى شەگىنە جاقىن. بۇزاقىلىق بويىنشا باسقا كىنالىلەرگە زاڭمەن بەلگىلەنگەن جوعارعى مەرزىمدەر – 7 جىلعا باس بوستاندىعىنان ايىرۋ جازاسى تاعايىندالدى»،—دەدى ول.
ايتا كەتەيىك، بۇگىن تالعاردا كىسى قولىنان مەرت بولعان ءجاسوسپىرىم شەرزات پولاتتىڭ ءىسى بويىنشا سوت پروتسەسىنە نۇكتە قويىلدى.
