قاراعاندى وبلىسىندا ايەل ادام ازاماتتىق نەكەدەگى كۇيەۋىمەن بىرگە 15 جاستاعى قىزىن 38 جاستاعى ەركەككە تۇرمىسقا بەرگەن، دەپ حابارلايدى «ادىرنا» ءتىلشىسى «7-ارناعا» سىلتەمە جاساپ.
وقيعا اباي قالاسىندا ناۋرىز ايىنىڭ ورتاسىندا بولعان. ءجاسوسپىرىم نەكە قيىلعاننان كەيىن بەس كۇن وتكەن سوڭ ءوز اكەسىنە قاشىپ بارعان. قىزدىڭ تۋعان اكەسى بىردەن پوليتسياعا ارىز ءتۇسىرىپ، ءىستى قۇقىق قورعاۋ ورگاندارىنا تاپسىرعان.
15 جاستاعى جاسوسپىرىمگە قاتىستى قىلمىس جاسادى دەگەن كۇدىككە ىلىنگەن 38 جاستاعى ەر ادام ۇستالىپ، ۋاقىتشا ۇستاۋ يزولياتورىنا قامالدى. اتالعان فاكتى بويىنشا قىلمىستىق ءىس قوزعالدى. قازىرگى تاڭدا قىز بالانىڭ اكەسى بۇرىنعى جۇبايىن اتا-انا قۇقىعىنان ايىرۋدى تالاپ ەتىپ وتىر.
«بالالارىمدى قولىما العىم كەلەدى. ۇلىم كامەلەت جاسقا تولماعان، قىزىم دا كامەلەتكە تولماعان، تاعى ءبىر كەنجە قىزىم بار. مەن ولاردىڭ بۇل وتباسىندا تۇرىپ، ومىرىنە قاۋىپ تونگەنىن قالامايمىن. بۇل وتە قورقىنىشتى جاعداي. مەنىڭ كەنجە قىزىم بار. ولار وعان دا «سەنى دە كەيىن كۇيەۋگە بەرەمىز»دەگەن»،— دەيدى قىزدىڭ اكەسى.
ايتا كەتەيىك، قازىر ءىستىڭ بارلىق ءمان-جايى انىقتالىپ جاتىر.
