تينا كاندەلاكي قازاقستان مەن ۇلىبريتانيا اراسىنداعى اسكەري كەلىسىمدى سىناپ، ونى «تاريحتى بىلمەيتىن ەلدىڭ» قادامىنا بالادى، دەپ حابارلايدى “ادىرنا”.
ونىڭ ايتۋىنشا، قازاقستان مەن ۇلىبريتانيا قورعانىس ۆەدومستۆولارى اراسىندا اسكەري ارىپتەستىك تۋرالى كەلىسىم جاسالعانى جۇما، 6 ماۋسىم كۇنى بەلگىلى بولعان.
“ەگەر ءبىر جاڭالىقتى ەشكىم بايقاماسىن دەسەڭ – ونى جۇما كەشكە جاريالا” دەيدى كاندەلاكي.
ونىڭ پايىمداۋىنشا، جەكسەنبى كۇنى قازاقستاننىڭ قورعانىس ءمينيسترى قىزمەتىنەن بوساتىلعانى بۇل كەلىسىمدى «جاسىرۋ ارەكەتىن» راستايدى. بۇعان قوسا، دەمالىس كۇندەرى لوندونمەن اراداعى كەلىسىم تۋرالى جاڭالىق قازاقستان قورعانىس مينيسترلىگىنىڭ سايتىنان الىنىپ تاستالعانىن دا ايتىپ ءوتتى.
“رەسەيدىڭ قاس جاۋى سانالاتىن ەلمەن اسكەري ارىپتەستىك ورناتۋ – بۇل تەمىرجول ستانتسيالارىن قايتا اتاۋ ەمەس. بىلتىر وسىعان قاتىستى پىكىرىم ءۇشىن مەنى قازاقستاننىڭ №1 جاۋى ەتىپ شىعارعان. بىراق بۇل – ودان دا كۇردەلى ماسەلە. ەسكە سالايىن، قازاقستان – ۇقشۇ-نىڭ (ۇجىمدىق قاۋىپسىزدىك تۋرالى شارت ۇيىمى – رەد.) مۇشەسى. ءدال وسى اسكەري بلوك 2021 جىلدىڭ قاڭتارىندا پرەزيدەنت توقاەۆ پەن ونىڭ اينالاسىن اسكەري توڭكەرىستەن قۇتقارىپ قالدى. ۆەنگريا نەمەسە سلوۆاكيا ەو-نىڭ سىرتقى ساياساتىمەن كەلىسپەي تۇرسا دا، رەسەيمەن اسكەري كەلىسىمگە وتىرا قويماس ەدى.
ء"ۇي ىشىنەن ءۇي تىگۋگە جول بەرىلمەيدى" - دەپۋتات قىزىلجارلىق سەپاراتيستەرگە قاتىستى مالىمدەمە جاسادى
ايتا كەتسەك، 6 ماۋسىم كۇنى قازاقستان مەن ۇلىبريتانيانىڭ قورعانىس مينيسترلىكتەرى اسكەري ىنتىماقتاستىق جوسپارىنا قول قويعانى حابارلانعان. قۇجاتقا سايكەس، تاراپتار بەيبىتشىلىكتى ساقتاۋ، تىلدىك دايىندىق جانە قازاقستاندىق اسكەري قىزمەتكەرلەردى ۇلىبريتانيانىڭ جوعارى اسكەري وقۋ ورىندارىندا وقىتۋ باعىتىندا جۇمىس ىستەمەك.
ەسكە سالا كەتەيىك، تينا كاندەلاكي بۇعان دەيىن دە قازاقستانداعى ورىس ءتىلىنىڭ قولدانىسىنا قاتىستى بىرنەشە رەت مالىمدەمە جاساعان. اتاپ ايتقاندا، ەلدەگى تەمىرجول ستانتسيالارىن قازاقشالاۋ باستاماسىنا قارسى شىققان. وسى مالىمدەمەلەردەن كەيىن قازاقستاننىڭ سىرتقى ىستەر مينيسترلىگى وعان ەلگە كىرۋگە تىيىم سالدى.
سونداي-اق، بۇعان دەيىن Deutsche Welle اقپارات اگەنتتىگى قازاقستاندا ەلگە كىرۋگە تىيىم سالىنعان تۇلعالاردىڭ «قارا ءتىزىمى» بار ەكەنىن حابارلاعان. بۇل تىزىمدە كاندەلاكيدەن بولەك رەسەي مەملەكەتتىك دۋماسىنىڭ دەپۋتاتتارى پەتر تولستوي، ەۆگەني فيودوروۆ، كونستانتين زاتۋلين، ۆياچەسلاۆ نيكونوۆ، جۇرگىزۋشى تيگران كەوسايان، فيلوسوف الەكساندر دۋگين، روسسوترۋدنيچەستۆو باسشىسى ەۆگەني پريماكوۆ جانە ساياساتتانۋشى نيكيتا مەندكوۆيچ تە بار.
