قازاقستان پرەزيدەنتى قاسىم-جومارت توقاەۆ امانگەلدى وماربەكوۆتى قىزمەتىنەن بوساتتى، دەپ حابارلايدى "ادىرنا" ۇلتتىق پورتالى.
ول شامامەن ءۇش جىل بويى قازاقستان رەسپۋبليكاسى قاۋىپسىزدىك كەڭەسى جانىنداعى جاعدايلىق ورتالىقتىڭ مەڭگەرۋشىسى قىزمەتىن اتقارعان.
بۇل اقپاراتتى اقوردا ءباسپاسوز قىزمەتى جاريالادى.
«مەملەكەت باسشىسىنىڭ وكىمىمەن وماربەكوۆ امانگەلدى ورازالىۇلى قازاقستان رەسپۋبليكاسى قاۋىپسىزدىك كەڭەسىنىڭ جاعدايلىق ورتالىعىنىڭ مەڭگەرۋشىسى قىزمەتىنەن بوساتىلدى»، - دەلىنگەن حابارلامادا.
امانگەلدى وماربەكوۆ 1982 جىلى دۇنيەگە كەلگەن. ول قازاق مەملەكەتتىك زاڭ اكادەمياسىندا قۇقىقتانۋ ماماندىعى بويىنشا جوعارى ءبىلىم العان، سونداي-اق ۇلتتىق قورعانىس ۋنيۆەرسيتەتىندە اسكەري جانە مەملەكەتتىك باسقارۋ باعىتى بويىنشا ماگيستراتۋرانى تامامداعان.
2005–2016 جىلدار ارالىعىندا ارنايى مەملەكەتتىك ورگانداردا قىزمەت ەتتى. 2016 جىلدان باستاپ 2022 جىلدىڭ تامىزىنا دەيىن قازاقستان رەسپۋبليكاسى قاۋىپسىزدىك كەڭەسى حاتشىلىعىندا ينسپەكتور، سەكتور مەڭگەرۋشىسى جانە حاتشىلىق مەڭگەرۋشىسىنىڭ ورىنباسارى لاۋازىمدارىندا جۇمىس اتقارعان. 2022 جىلدىڭ تامىز ايىندا پرەزيدەنت وكىمىمەن قاۋىپسىزدىك كەڭەسىنىڭ جاعدايلىق ورتالىعىنىڭ مەڭگەرۋشىسى بولىپ تاعايىندالعان بولاتىن.
