استانادا مەديتسينا قىزمەتكەرلەرى كۇنىنە وراي ەلىمىزدىڭ دەنساۋلىق ساقتاۋ سالاسىنىڭ ۇزدىكتەرىن ماراپاتتاۋ ءراسىمى ءوتتى، دەپ حابارلايدى “ادىرنا” ۇلتتىق پورتالى.
سالتاناتتى شارا بارىسىندا 68 مەديتسينا مامانى مەملەكەتتىك جانە سالالىق ماراپاتتارعا يە بولدى. ولاردىڭ قاتارىندا «بارىس»، «پاراسات»، «دوستىق»، «قۇرمەت» وردەندەرىمەن، سونداي-اق «ەرەن ەڭبەگى ءۇشىن» جانە «شاپاعات» مەدالدارىمەن ماراپاتتالعاندار بار.
سونداي-اق، «كاسىبىنىڭ ۇزدىگى» رەسپۋبليكالىق بايقاۋىنىڭ جەڭىمپازدارى انىقتالىپ، كاسىبي شەبەرلىگى مەن جانقيارلىعى ءۇشىن دارىگەرلەر، مەدبيكەلەر، فارماتسەۆتەر جانە باسقا دا ماماندار ارنايى ماراپاتقا يە بولدى.
ءىس-شارادا قر پرەمەر-ءمينيسترىنىڭ ورىنباسارى ەرمەك قوشەرباەۆ پەن دەنساۋلىق ساقتاۋ ءمينيسترى اقمارال ءالنازاروۆا قۇتتىقتاۋ ءسوز سويلەپ، مەديتسينا قىزمەتكەرلەرىنىڭ ەڭبەگىنە جوعارى باعا بەردى.
«بۇل جاندار كۇن سايىن ادام ءومىرىن قۇتقارىپ، جوعارى كاسىبيلىكتى كورسەتىپ ءجۇر. بارشا جەڭىمپازداردى شىن جۇرەكتەن قۇتتىقتاي وتىرىپ، حالىققا كورسەتكەن قىزمەتتەرىڭىز ءۇشىن العىسىمدى بىلدىرەمىن»، – دەدى ەرمەك قوشەرباەۆ.
قازىرگى تاڭدا دەنساۋلىق ساقتاۋ جۇيەسىندە 378 مىڭنان استام ادام ەڭبەك ەتەدى، ونىڭ 271 مىڭى – مەديتسينا قىزمەتكەرلەرى. مينيستر اقمارال ءالنازاروۆا جىل باسىنان بەرى 1,4 ملن ناۋقاسقا ستاتسيونارلىق كومەك كورسەتىلگەنىن، 445 مىڭ وتا جاسالعانىن جانە جەدەل جاردەم 2,7 ميلليوننان استام شاقىرتۋعا بارعانىن مالىمدەدى.
سونىمەن قاتار، اۋىلدىق جەرلەرگە دارىگەر تارتۋ شارالارى جالعاسىپ جاتىر. 2023 جىلدان باستاپ اۋىلعا بارعان ماماندارعا 100 اەك مولشەرىندە تولەم، جەڭىلدەتىلگەن نەسيە جانە ۇستەماقى قاراستىرىلعان.
پرەزيدەنت قاسىم-جومارت توقاەۆ تا مەديتسينا قىزمەتكەرلەرىنىڭ قوعامداعى ورنى مەن الەۋمەتتىك مارتەبەسىنىڭ ماڭىزدىلىعىن ۇنەمى اتاپ وتەدى. 2024 جىلى مەملەكەت باسشىسى وسى سالاداعى قىزمەتكەرلەردىڭ قۇقىعى مەن قورعالۋىنا باعىتتالعان زاڭعا قول قويدى.
ۇقساس جاڭالىقتار
