ەر ادام تاكسي جۇرگىزۋشىسىن ءولتىردى دەگەن كۇدىككە ءىلىندى

پەتروپاۆلدا 60 جاستاعى تاكسي جۇرگىزۋشىسى جولاۋشىمەن جانجالدان كەيىن اۋىر جاراقات الىپ، كوز جۇمدى، دەپ حابارلايدى “ادىرنا” ۇلتتىق پورتالى. كۋاگەرلەردىڭ ايتۋىنشا، وقيعا وتكەن جەكسەنبىدە پودگورا اۋدانىندا بولعان. تاكسي جۇرگىزۋشىسى كولىگىنە ماس كۇيدەگى جولاۋشىلاردى وتىرعىزعان. جانجال جولاۋشىنىڭ كولىك ىشىندە تەمەكى شەگۋىنەن باستالعان. «جۇرگىزۋشى جولاۋشىعا ەسكەرتۋ جاساپ، تەمەكىسىن تارتىپ العان. بىراق جولاۋشى تاعى ءبىر تەمەكى شىعارعان. سول ساتتەن باستاپ سالوندا ءسوزتالاس باستالعان. كەيىن ولار التىنسارين كوشەسىندەگى شىركەۋ ماڭىنا كەلگەندە جانجال توبەلەسكە ۇلاسقان. جولاۋشى جۇرگىزۋشىنى ۇرعان. ءدال قالاي بولعانىن بىلمەيمىز، مۇمكىن جۇرگىزۋشى دە وعان سوققى جاساعان شىعار. بىراق جۇرگىزۋشى اسفالتقا قۇلاپ، باسىن قاتتى ۇرىپ العان. كوماعا تۇسكەن ەدى، بۇگىن قايتىس بولدى»، – دەيدى قالالىق تاكسي جۇرگىزۋشىلەرى. پوليتسيا ازىرگە وقيعانىڭ تولىق ءمان-جايىن جاريالاعان جوق. الايدا كۇدىكتىنىڭ ۇستالعانىن راستادى. «پەتروپاۆلدا پوليتسيا قىزمەتكەرلەرى 60 جاستاعى تاكسي جۇرگىزۋشىسىنە اۋىر دەنە جاراقاتىن سالعان دەگەن كۇدىكپەن ەر ادامدى ۇستادى. جابىرلەنۋشى العان جاراقاتىنان كەيىن كوز جۇمدى. قازىر اتالعان فاكتى بويىنشا بارلىق قاجەتتى تەرگەۋ امالدارى جۇرگىزىلۋدە. وقيعانىڭ بارلىق ءمان-جايى مەن سەبەپتەرى انىقتالىپ جاتىر»، – دەپ حابارلادى سقو پوليتسيا دەپارتامەنتىنىڭ ءباسپاسوز قىزمەتى.