جامبىل وبلىسى بويىنشا قازاقستان ستۋدەنتتەر اليانسى رەسپۋبليكالىق ستۋدەنتتەر قوزعالىسى وبلىس اكىمدىگىنىڭ دەنساۋلىق ساقتاۋ باسقارماسىنىڭ الەۋمەتتىك تاپسىرىسى اياسىندا وڭىردەگى اۋرۋحانا، ەمحانا، الەۋمەتتىك قىزمەت كورسەتۋ مەكەمە قىزمەتكەرلەرىنىڭ قاتىسۋىمەن ءپاللياتيۆتى كومەكتى كورسەتۋ بويىنشا بىلىكتىلىگىن ارتتىرۋ سەمينار-ترەنينگى ۇيىمداستىردى. ەكى كۇنگە سوزىلعان سەمينار-ترەنينگ ناتيجەسىندە جاستار قوزعالىسىنىڭ بەلسەندى مۇشەسى سانالاتىن 30 ستۋدەنت ءپاللياتيۆتى كومەك كورسەتۋ قۇزىرەتىنە يە بولدى. سايكەسىنشە بۇل ەرىكتىلەر توبىن جامبىل مەديتسينالىق جوعارى كوللەدجى، «تاراز-بولاشاق» مەديتسينالىق كوللەدجى سىندى وقۋ ورىندارىندا وقيتىن، كاسىپتىك باعدارى بار جاستاردان قۇراۋعا باسا ءمان بەرىلگەن.
قازاقستان رەسپۋبليكاسى پرەزيدەنتىنىڭ جارلىعىمەن جاريالانعان ەرىكتىلەر جىلىندا بۇل جاستار كومەكتىڭ اتالعان ءتۇرىن جولعا قويۋ باعىتىندا جۇمىس جۇرگىزۋدى جوسپارلاپ وتىر.
«ەرىكتىلەر جىلى قارساڭىندا ءپاللياتيۆتى كومەك شارالارىن دا جولعا قويۋدى جوسپارلاپ وتىرمىز. ءپاللياتيۆتى كومەك اسا اۋىر جاعدايدا توسەككە تانىلعان ناۋقاستاردى كۇتىپ-باپتاۋدى كوزدەيدى. ءبىزدىڭ ەلىمىزدە ءپاللياتيۆتى كومەكتى ەرىكتىلىكپەن ۇشتاستىرۋ جۇمىستارى ەندى-ەندى جولعا قويىلعان. سايكەسىنشە بىزدە ءوز تاراپىمىزدان بۇل جۇمىستاردى ۇيىمداستىرۋدا «قامقور» ءپاللياتيۆتى كومەك كورسەتۋ ورتالىعىمەن مەموراندۋم جاسادىق ەرىكتىلەر وسى ورتالىقتا قىزمەت ەتەتىن بىلىكتى مامانداردان ءدارىس الادى. سودان سوڭ جەدەل توپقا قوسىلىپ، كە مۇقتاجا ادامدارعا كومەك كورسەتەدى. وسى باعىتتا 30 ەرىكتى جۇمىس جاساماق. ءبىزدىڭ وبلىس ءۇشىن مۇنىڭ ءوزى ۇلكەن جەتىستىك سانالادى»، – دەيدى وبلىس بويىنشا قازاقستان ستۋدەنتتەرىنىڭ اليانسى جاستار قوعامدىق بىرلەستىگىنىڭ توراعاسى قانىبەك مۇراتباەۆ.
شىندىعىندا وڭىردەگى ستۋدەنتتەردىڭ حال-احۋالىن باستى نازاردا ۇستايتىن جاستار قوزعالىسىنىڭ وسىناۋ باتىل باستاماعا قادام جاساۋى قۋانتادى. نەگىزىنەن پاللياتيۆتىك كومەكتى ۇيىمداستىرۋشى ەرىكتىلەر دەرتى اسقىنىپ، توسەككە تانىلعان ەمدەلۋشىلەردىڭ سوماتيكالىق، پسيحيكالىق جانە رۋحاني جاعدايىن جاساۋمەن اينالىسادى. ماسەلەن قازاقستاندا ونكولوگيالىق اۋرۋ سالدارىنان بولاتىن ءولىم كورسەتكىشى تىم جوعارى. ءبىزدىڭ وڭىردە دە وبىر اۋرۋىنان 1000- عا جۋىق ادام قايتىس بولادى. ياعني بۇل دەرتكە شالدىققان جاندار رەسپۋبليكاداعى حوسپيستىك جانە پاللياتيۆتىك كومەك قاجەت ەتىلەتىن نەگىزگى اۋديتوريانى قۇراۋشىلار بولىپ تابىلادى.
«ادىرنا»
ۇلتتىق پورتالى
