ءبىز – سوناۋ توقسانىنشى جىلدارى تار زاماندا تارىداي شاشىلىپ كەتكەن قانداستارىن اتامەكەنگە جيناعان الەمدەگى ءۇش ەلدىڭ ءبىرى بولعانىمىزدى ماقتانىشپەن ايتۋىمىز كەرەك.
وبلىس اكىمدىگى ىشكى ساياسات باسقارماسىنىڭ جانە «دۇنيەجۇزى قازاقتار قاۋىمداستىعى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ ۇيىمداستىرۋىمەن شەتەلدەن قونىس اۋدارعان قانداستارىمىزدى قولداۋ ماقساتىندا «ورتاق وتان - قازاقستان!» اتتى وبلىستىق فورۋم ءوتتى. فورۋمنىڭ قادىرلى قوناعى بولىپ قاۋىمداستىقتىڭ توراعاسىنىڭ ورىنباسارى زاۋىتبەك تۇرىسبەكوۆ، قازاقستاننىڭ ەڭبەك ەرى ساۋرانباي دونەنباەۆ، «مىڭارال تاس كومپاني» جشس باس ديرەكتورى مۇرتازا بۇلۇتاي جانە ءوڭىردىڭ زيالى قاۋىمى، ارداگەرلەرى قاتىستى. فورۋم وزگە ەلدەن ءوز ەلىمىزگە قونىس اۋدارىپ جاتقان قانداستارىمىزعا ارنالعان «دالا دانالارى» ءفيلمىنىڭ كورسەتىلىمىنەن باستالدى.
القالى جيىندا ءسوز العان زاۋىتبەك تۇرىسبەك سوناۋ 1991 جىلى 31 جەلتوقساندا قازاق راديوسىنان ەكس-پرەزيدەنت نۇرسۇلتان نازارباەۆتىڭ شەتەل قازاقتارىنا ارنايى مəلىمدەمە جاساعانىن ەسكە الدى.
"پرەزيدەنت ءوز سوزىندە، الەمنىڭ ءار ەلىندە عۇمىر كەشىپ جاتقان باۋىرلامىزدى ەلگە قايتۋعا شاقىردى. سول سالەمدەمە سوزدەن باستاپ قازاقستانعا كەلەمىن دەپ ات باسىن بۇرىپ، ۇلى كوشتىڭ تەڭىن بۋىپ، تىزگىنىن قاققان باۋىرلار وتانعا ورالۋدىڭ قامىنا كىرىستى. 1992 جىلى دۇنيەجۇزى قازاقتارىنىڭ العاشقى قۇرىلتايىن وتكىزۋگە دايىندىقتىڭ رۋحاني جوسپارىن تاۋەلسىزدىك جاريالانعاننان كەيىن ون بەس كۇن وتكەن سوڭ باستالىپ كەتتى. بۇل اتاۋلى وقيعانى بارشا قازاق قۋانا قارسى الدى. بىرىنشىدەن، "وتانداستارىمىز ەلگە ورالادى، ەكىنشىدەن قازاقتىڭ سانى ارتادى" دەپ بوركىمىزدى اسپانعا اتتىق"-دەيدى ول.
ال وبلىس əكىمىنىڭ ورىنباسارى سۇلۋشاش قۇرمانبەكوۆا جالپى، ات قازىعىن بايلار اتامەكەنگە تاۋەلسىزدىك العالى بەرى 300 مىڭداي وتباسى كوشىپ كەلگەنىن تىلگە تيەك ەتىپ، ەل حالقىنىڭ سانى 1 ملن قانداسىمىزبەن تولىققانىن جəنە اۋليەتاتا جەرىنە وسى جىلدارى 15018 وتباسىدان قۇرالعان 57919 قانداس قونىس اۋدارعانىن ايتتى. م.ح.دۋلاتي ات. تارمۋ دوتسەنتى ج.سەيتقۇلوۆا، «دۇنيەجۇزى قازاقتار قاۋىمداستىعى» رەسپۋبليكالىق قوعامدىق بىرلەستىگىنىڭ وبلىستىق فيليالى ج.اسەموۆ، بايزاق اۋدانىنىڭ تاريحي-ولكەتانۋ مۋزەيىنىڭ ديرەكتورى س.قالمۇراتوۆتار دا ءسوز الىپ، شەت ەلدە تۇرىپ جاتقان قانداستارىمىزدى ەلگە قايتارۋ جۇمىسى əر قاراي دا جاندانا ءتۇسۋ كەرەكتىگىن اتاپ ءوتتى. فورۋم سوڭىندا شەتتەگى قازاقتاردى تاريحي وتانعا قايتارۋ ىسىنە سۇبەلى ۇلەستەرىن قوسقان بىرقاتار جامبىلدىقتار ماراپاتتالدى.
«ادىرنا»
ۇلتتىق پورتالى
