«اۋىل شارۋاشىلىعىن قارجىلاي قولداۋ قورى» اق كاسىپ باستايمىن دەگەن ازاماتتارعا 6 پايىزبەن نەسيە بەرىپ، شارۋالارعا زور قولداۋ جاساپ جاتىر. بۇعان دەيىن اۋىل شارۋاشىلىعى باعىتىندا نەسيە بەرگەن قور تاياۋدان باستاپ قالا ازاماتتارىندا قارجىلاندىرماق.
اۋىل شارۋاشىلىعىن قارجىلاي قولداۋ قورى قوي شارۋاشىلىعىن قولداۋعا باعىتتالعان نەسيەلەۋ باعدارلامالارىن جۇزەگە اسىرادى. جەڭىلدىكپەن بەرىلەتىن نەسيە قارجىعا شاعىن شارۋاشىلىقتار ءىرى قارا، ۇساق مال، جىلقى، قۇس، بال ارالارىن ساتىپ الادى.
رەسپۋبليكاداعى مال شارۋاشىلىعى كەڭىنەن قانات جايعان جامبىل وبلىسىندا قوي شارۋاشىلىعىمەن اينالىساتىن قوجالىقتار كوپ. سولاردىڭ ءبىرى جۋالى اۋدانى، كۇرەڭبەل اۋىلىندا تۇراتىن «دياس» شارۋا قوجالىعىنىڭ باسشىسى ءمولدىر بايساقالوۆا. ول «سىباعا» باعدارلاماسى ارقىلى نەسيە راسىمدەپ، قوي شارۋاشىلىعىمەن اينالىسۋعا مىقتاپ كىرىسكەن. ءمولدىر بايساقالوۆانىڭ ايتۋىنشا، قوردىڭ نەسيە شارتتارى مەن تالاپتارى وڭاي جانە جەڭىلدىك مەرزىمى بار قاراستىرىلعان .
«اۋىل شارۋاشىلىعىن قارجىلاي قولداۋ قورىنان «سىباعا» باعدارلاماسى ارقىلى 6,5 جىلعا 6 پروتسەنتپەن 10 ملن تەڭگە نەسيە راسىمدەپ، وعان 260 باس قوي مەن 9 قوشقار جانە مالدىڭ جەم-ءشوبىن ساتىپ الدىم. ەكى ادامعا جۇمىس بەرىپ وتىرمىن. ءوزىم 2008-جىلى قارجىگەر ماماندىعى بويىنشا جوعارى ءبىلىم العانمىن. بىراق، كەڭسەدە جۇمىس ىستەگەننەن گورى شارۋاشىلىقپەن اينالىسقاندى ءجون ساناپ، ىسكە كىرىسىپ كەتتىم. نەگىزى، مالدا بەرەكە بار. «مال وسىرسەڭ قوي ءوسىر، تابىسى ونىڭ كول-كوسىر» دەگەن ءسوز بار عوي. سول ايتقانداي، قوي شارۋاشىلىعى مول تابىس تابۋعا بولاتىن سالا دەپ ەسەپتەيمىن. ارينە، مال باعۋ، ءوسىرۋ دەگەن قاجىرلى ەڭبەكتى قاجەت ەتەدى. ءار جۇمىستىڭ ءوز بەينەتى بار، سوعان وراي زەينەتى دە بولادى. سوندىقتان، جۇمىستان قورىقپاۋ كەرەك، دەپ ويلايمىن. ادال ەڭبەككە نە جەتسىن؟ الداعى ۋاقىتتا وسى مالىمدى كوبەيتىپ، ەتىن ەكسپورتقا شاعىرسام، دەگەن جوسپارىم بار. قوردىڭ نەسيە شارتتارى مەن تالاپتارى كوڭىلىمىزدەن شىعادى. بيىل قوردىڭ قۇرىلعانىنا 25 جىل تولىپ وتىر ەكەن. قۇتتىقتايمىن، وسى سالادا جۇمىس ىستەپ جاتقان بارلىق ازاماتتارعا مول تابىس، زور دەنساۋلىق تىلەيمىن!»، - دەيدى قوجالىق باسشىسى ءمولدىر بايساقالوۆا.
قازىرگى ۋاقىتتا شارۋاشىلىق باسشىسى ءمولدىر بايساقالوۆانىڭ قولىندا ەت ەكسپورتىمەن اينالىساتىن «وڭتۇستىك حالال تاعامدارى» جشس-مەن جاساسقان قوي ەتىن تاپسىرۋ كەلىسىمشارتى بار. ياعني، تاياۋ ۋاقىتتا «دياس» شارۋا قوجالىعى قوي ەتى ەكسپورتىنا ۇلەس قوسادى.
اۋىل شارۋاشىلىعىن قارجىلاي قولداۋ قورىنىڭ جامبىل وبلىسىنداعى فيليالى «سىباعا» باعدارلاماسىمەن 58 شارۋاعا 588 ملن 897 مىڭ تەڭگە نەسيە بەرىپ، وعان 17 702 باس قوي ساتىپ الىندى.
«سىباعا» باعدارلاماسىنىڭ باستى ماقساتى – ەت ەكسپورتىنىڭ الەۋەتىن ارتتىرۋ. سول ءۇشىن شارۋالارعا بارىنشا جەڭىلدىكتەر قاراستىرىلادى. اۋىل شارۋاشىلىعىن قارجىلاي قولداۋ قورى ۇساق مال باسىن كوبەيتۋگە نەسيە بەرەدى. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ مەملەكەتتىك باعدارلاماسى اياسىندا قوي شارۋاشىلىعىنا 12 ميلليون تەڭگەگە دەيىنگى نەسيە 6,5 جىلعا 6 پروتسەنتپەن بەرىلەدى. 2 جىلعا دەيىنگى جەڭىلدىك مەرزىمى قاراستىرىلعان. ياعني، وسى ارالىقتا شارۋا نەگىزگى بورىش پەن ۇستەمەنى تولەمەيدى. نەسيەگە مال، تەحنيكا جانە مال ازىعى ساتىپ الىنادى.
بيىل قوردىڭ قۇرىلعانىنا 25 جىل. وسى ۋاقىت ارالىعىندا جالپى سوماسى 312 ملرد تەڭگە بولاتىن 152 مىڭ نەسيە بەرىلدى. بيىلعى جىلدىڭ سوڭعى كورسەتكىشى بويىنشا بارلىق باعىتتار بويىنشا 51 ملرد 296 ملن تەڭگەنى قۇرايتىن 11 351 جوبا قارجىلاندىرىلدى.
«ادىرنا»
ۇلتتىق پورتالى
