اشىق قوعامداعى بيلىكتىڭ ءبىر وكىلى – ۇكىمەتتىك ەمەس ۇيىمدار بولىپ ەسەپتەلەدى. ەلىمىزدە وتكەن جىلى عانا جۇمىسىن باستاعان ازاماتتىق ورتالىقتار ۇەۇ الەۋەتىن ارتتىرۋعا كۇش سالۋدا.
2018 جىلى تاراز قالاسىندا وبلىس اكىمدىگى ىشكى ساياسات باسقارماسىنىڭ تاپسىرىسىمەن وبلىستىق ۇكىمەتتىك ەمەس ۇيىمدارعا ارنالعان ازاماتتىق ورتالىق اشىلعان-دى. بۇگىندە اتالعان ورتالىق ۇەۇ جۇمىسىن ىلگەرلەتۋگە ىقپال ەتۋدە. ازاماتتىق ورتالىق ۇەۇ قىزمەتىنىڭ باعىتتارىن بىرىكتىرۋگە، ازاماتتىق قوعام ينستيتۋتتارىنىڭ وزەكتى ماسەلەلەرىن شەشۋگە باعىتتالعان.
سونىمەن قاتار، ورتالىقتىڭ جۇمىسى اياسىندا «ۇەۇ مەكتەبى»، كوشپەلى سەمينارلار، مەملەكەتتىك الەۋمەتتىك تاپسىرىسپەن اينالىساتىن مەملەكەتتىك قىزمەتكەرلەردىڭ بىلىكتىلىگىن ارتتىرۋ ءۇشىن سەمينار-ترەنينگتەر، ۇەۇ اراسىندا «ەڭ ۇزدىك الەۋمەتتىك جوبا» بايقاۋى ۇيىمداستىرىلادى.
بۇعان قوسا، ورتالىقتىڭ ينتەرنەت-سايتى ازاماتتاردىڭ ساۋالدارىنا جاۋاپ بەرەدى ءارى ۇسىنىس-تىلەكتەرىنە قولداۋ كورسەتەدى.
«جامبىل وبلىسىندا ءبىر تەرەزە ءپرينتسيپى بويىنشا قىزمەت ەتەتىن ۇكىمەتتىك ەمەس ۇيىمدارعا كومەك كورسەتۋگە ارنالعان ازاماتتىق ورتالىقتىڭ قىزمەتىن ۇيىمداستىرۋ» جوباسى «ازاماتتىق باستامالاردى قولداۋ ورتالىعى» كوممەرتسيالىق ەمەس اكتسيونەرلىك قوعامىنىڭ گرانتى اياسىندا جانە قر اقپارات جانە قوعامدىق دامۋ مينيسترلىگى قولداۋىمەن وڭىرلەردە ۇكىمەتتىك ەمەس ۇيىمداردى قولداۋ ءارى ساپاسىن ارتتىرۋ ماقساتىندا ىسكە اسىرىلعان.
«وتكەن جىلدىڭ باستى جەتىستىگى – وبلىستىق ۇكىمەتتىك ەمەس ۇيىمدارعا ارنالعان ازاماتتىق ورتالىقتىڭ اشىلۋى بولدى. ۇكىمەتتىك ەمەس ۇيىمدارعا ء"بىر تەرەزە" قاعيداتى بويىنشا اقپاراتتىق كەڭەس بەرىپ، ۇيىمدىق قولداۋ كورسەتۋ ناتيجەسىن بەردى. ول ايماقتاعى ءاربىر كوممەرتسيالىق ەمەس ۇيىمدار ءۇشىن برەندكە اينالدى. وبلىس پەن كونە شاھارىمىزدى وركەندەتۋگە ۇلەس قوسىپ جۇرگەن 200-دەن اسا ۇكىمەتتىك ەمەس ۇيىمدار بىزدەن جان-جاقتى قولداۋ تاۋىپ، وزدەرىنىڭ تىڭ جوبالارىن جۇزەگە اسىرۋدا، – دەيدى «جامبىل وبلىسىنىڭ ازاماتتىق اليانس قاۋىمداستىعى» زتب پرەزيدەنتى زايتجان يۋلداشەۆ.
سونداي-اق، ونىڭ ايتۋىنشا، ورتالىقتا ۇەۇ زاڭ بويىنشا كەڭەستەر بەرىلىپ، «ۇكىمەتتىك ەمەس ۇيىمدار مەكتەبى» جوباسى اياسىندا قىزمەتكەرلەر مەن ەرىكتىلەردى ۇكىمەتتىك ەمەس ۇيىمداردىڭ جۇمىسىنا باۋلۋ ءۇشىن شەبەرلىك-سىنىپتارى مەن سەمينارلار وتكىزەدى ەكەن.
ۇەۇ ارنالعان ازاماتتىق ورتالىق – بۇل فورۋم، فەستيۆال جانە باسقا دا ءىس-شارالاردى وزكىزەتىن الاڭ ەمەس. ءبىز كوزدەگەنىمىز – وبلىستاعى 10 اۋداندا ۇكىمەتتىك ۇيىمداردىڭ رەسۋرستىق ورتالىقتارىن اشۋعا كومەكتەسۋ. وندا ءتىپتى كوممەرتسيالىق ەمەس ۇيىمداردىڭ وكىلدەرى دە، ترەنينگ، كەزدەسۋلەر وتكىزە الادى، – دەيدى ول.
ايتا كەتەيىك، بۇگىنگى تاڭدا وبلىسىمىزدا 700 استام ۇيىم تىركەلگەن بولسا، ونىڭ 200-گە جۋىعى عانا ءوڭىردىڭ تىنىس-تىرشىلىگىنە ارالاسىپ ازاماتتىق قوعام ينستيتۋتتارىنىڭ دامۋىنا ۇلەس قوسىپ جۇرگەن كورىنەدى.
«ادىرنا»
ۇلتتىق پورتالى
