بالا كەزىمدە حاكان شۇكىر مەن حاcان شاشتاردىڭ ءداۋىرى ءجۇرىپ تۇردى. سولاردىڭ اتى جازىلعان فورمانى كيگىمىز كەلەتىن.
ەردوعاندى ءبىرى تۇركى الەمىنىڭ باتىرى سانايدى، ەندى ءبىرى كەرىسىنشە ۇناتپايدى. تۇرىكتەردىڭ وزدەرى دە تۋرا وسىنداي ەكىگە بولىنگەن. ايتپاعىم مىناۋ عوي.
ايگىلى حاكان شۇكىر ەردوعاننىڭ ساياساتىنان زارداپ شەكتىم دەگەنىنە بىرنەشە جىل بولدى. فۋتبولدان تۇركيا قۇراماسىنىڭ تالانتتى ويىنشىسى، 2002 جىلعى الەم چەمپيوناتىنىڭ قولا جۇلدەگەرى حاكان شۇكىر بۇگىندە اقش-تا uberدە تاكسيست بولىپ، جان باعىپ ءجۇر ەكەن. الەمنىڭ فۋتبولدان جارقىن جۇلدىزىنا ولاي ەتۋىنە ەردوعان جاقتاستارىنىڭ قۋدالاۋ ساياساتى اسەر ەتكەن.
بىرنەشە جىل بۇرىن ول ەردوعاننىڭ پارتياسىنا مۇشە بولىپتى. بىراق ونداعى جەمقورلىقتىڭ كوپتىگىنەن پارتيادان ءوز ەركىمەن شىعىپ، ونىڭ جۇمىسىن سىناي باستاعان. ال 2015 جىلى تۇركياداعى قىسىمنان كەيىن مۇحيت اسىپ، اقش-قا قونىس اۋدارعان. ونى قۋدالاۋ جالعاسىپ، بارلىق ەسەپشوتتارى بۇعاتتالعان. 2016 جىلى حاكان شۇكىردى گۇلەنشىلەرمەن قاتىسى بار دەپ ايىپتاپ، وعان ىزدەۋ جاريالانعان بولاتىن.
"مەنىڭ جۇمىس ىستەي باستاعان سەبەبىم مەندە ەشتەڭە قالمادى. ەردوعان مەنەن بارلىعىن تارتىپ الدى. ول مەنەن تاۋەلسىز بولۋ قۇقىعىن، وي ەركىندىگىن، جۇمىس جاساۋ قۇقىعىن الىپ قويدى. ولار مەنىڭ ايەلىمنىڭ دۇكەنىنە تاس لاقتىردى، مەنىڭ بالالارىما كوشەدە قوقان-لوققى جاسالدى، مەن ءاربىر جاساعان ۇندەۋىمنەن كەيىن قورقىتۋ مەن ۇركىتۋ ارەكەتتەرىنە تاپ بولدىم. مەن ەلدەن كەتكەنىمدە ولار مەنىڭ اكەمدى تۇتقىندادى. مەنىڭ وسى ۋاقىتقا دەيىن جيناعان بارلىق مۇلكىمدى تاركىلەدى. بۇل مەنىڭ وتباسىما اۋىر سوقتى. قازىر مەنىمەن قاتىناسى بار بارلىق جاندار ۇلكەن قارجىلىق داعدارىستا ءجۇر", - دەدى حاkان "رەكورد" باسىلىمىنا بەرگەن سۇحباتىندا. ول اقش-تا اشقان كافەسىن بەلگىسىز بىرەۋلەر تۇرتپەكتەپ، كەدەرگى جاساعاندىقتان جاۋىپ تاستاۋعا ءماجبۇر بولىپتى.
ساياسي ويىنداردىڭ قۇرباندىعىنا ساياساتقا قاتىسى جوق ادامداردىڭ شالىنعانى قيىن-اق.
اسحات قاسەنعالي
"ادىرنا" ۇلتتىق پورتالى
