بۇگىن 21 قاڭتاردا تاڭەرتەڭگى 10:00-دە شىعىس قازاقستان وبلىسى، زايسان قالاسىندا "شەكارانى زاڭسىز كەسىپ ءوتتى" دەپ ايىپتالعان قاستەر مۇساحانۇلى مەن مۇراگەر ءالىمۇلىنىڭ ءىسى بويىنشا كەزەكتى سوت وتىرىسى باستالدى.
ساعات 10:00-دە باستالۋى ءتيىس سوت وتىرىسى 10:45 كەشىگىپ باستالدى.
سوت زالىنان "ادىرنا" ۇلتتىق پورتالىنىڭ رەداكتورى وڭعار قابدەن تىكەلەي ەفيردەن حابار تارتتى:
وڭعار قابدەننىڭ ايتۋىنشا، سوتقا وتە كوپ ادام جينالعاندىقتان جۇرت شاعىن زالعا سىيمادى. سوتقا قاستەر مەن مۇراگەردىڭ تۋعان-تۋىستارىنان بولەك، زايساننىڭ جەرگىلىكتى باسىلىمىنان جۋرناليستەر، قازاقستاننىڭ ءتۇرلى ايماقتارىنان كەلگەن بەلسەندىلەر، جەلتوقسانشىلار، بلوگەر ازاماتتار كەلگەن.
تىكەلەي ەفيردەن بايقاعانىمىزداي، سوت زالى جينالعان قاۋىمعا تارلىق ەتكەن. جينالعاندار سوت زالىنىڭ تارلىعىنا نارازى ەكەنىن اشىق بىلدىرۋدە.
وڭعار قابدەننىڭ ايتۋىنشا، سوت زالىنا سىيماعان حالىق وزدەرىنىڭ وكىلدەرىن جىبەرىپ، سىرتتا تۇرۋعا كەلىسىم بەرگەن.
سوت بارىسىندا پروكۋرور "شەكارانى زاڭسىز كەسىپ ءوتتى" دەپ ايىپتالعان شىڭجاڭ قازاقتارى قاستەر مەن مۇراگەردىڭ ارقايسىسىن ءبىر جىلعا سوتتاۋدى سۇرادى. مەملەكەتتىك ايىپتاۋشى "جەڭىلدەتىلگەن ءمان-جايلاردى ەسكەرىپ" ولاردى قىتايعا قايتارماۋدى ءوتىندى.
ال قورعاۋ تارابى ولاردى كىناسىز دەپ تانىپ، قىلمىستىق جاۋاپكەرشىلىكتەن بوساتۋدى سۇرادى. ادۆوكات ءلاززات احاتوۆا ەكى جىگىتتىڭ قىتايداعى قىسىمنان قاشىپ، "شەكارانى زاڭسىز كەسىپ وتۋگە" ءماجبۇر بولعانىن ايتتى. ال سوتتا وزدەرىنە تاعىلعان ايىپتاردى مويىنداعان قاستەر مۇساحانۇلى مەن مۇراگەر ءالىمۇلى وزدەرىن قىتايعا قايتارماۋدى سۇرادى. سۋديا وسپانوۆا نۇر-سۇلتان ۋاقىتىمەن 16:00-دە ۇكىم وقىلاتىنىن ايتىپ، كەڭەسۋ بولمەسىنە كەتتى.
"ادىرنا" ۇلتتىق پورتالى
