ءوزىن انتيفاشيست قاھارمان، ينتەرناتسيوناليست كۇرەسكەر بەينەسىندە جارنامالاپ جۇرگەن باحىتجان كوپباەۆ پەن ونىڭ ارىپتەسى اننا نەۆسكايا رەسەي تەلەارنالارىنىڭ بىرىنە بەرگەن سۇحباتىندا «قازاقستاندا فاشيزم باس كوتەردى» دەگەن ەدى. (
قازاقستانداعى «قازاق فاشيستەرى» كىمدەر؟
05.02.2020
4348
«بۇلاردىڭ ءدال وسىنداي تۇجىرىم جاساۋىنىڭ سەبەبى نە؟» دەگەن ساۋالعا ينتەرنەت جەلىسىنەن جاۋاپ ىزدەدىك. سويتسەك، ارتىڭگى جىلدارى ماناس بەستاەۆ اتتى ماسكۇنەم، قازاق تىلىنەن ماقۇرىم شالاقازاق «ورىس الەمىن» بىلاپىت سوزدەرمەن بالاعاتتاپ، «ءبىر كەزدە سەندەر قازاق ۇلتىنىڭ جارتىسىن قىرىپ تاستاعانسىڭدار، سول ءۇشىن سەندەردى كەسكىلەپ ولتىرەمىز! ءتىپتى سەندەردى كەسكىلەپ ولتىرمەي-اق اشتىقپەن قىرامىز!» دەپ شاتپاقتاعان كورىنەدى. ماس كۇيىندەگى ساندىراعى ءۇشىن سول بايعۇس بارىنشا سازايىن تارتىپتى: تال تۇستە بىرنەشە ادام جابىلىپ سويىلمەن ەسىنەن تاندىرا ۇرىپ، سوققىعا جىعىپ كەتكەن! (). الەۋمەتتىك جەلى قولدانۋشىلارى دا وعان سەس كورسەتۋ اۋانىمەن جاۋاپ قايتارىپتى. ارينە، قۇقىق قورعاۋ ورگاندارى تاراپىنان دا ول ءتيىستى جازاسىن الدى.
ال ب. كوپباەۆ بولسا قايداعى ءبىر ماسكۇنەمنىڭ ارەكەتىن ءوزىن جارنامالاۋعا اككىلىكپەن پايدالانا قويعان. ءسويتىپ، يۋتۋب ارناسى ارقىلى ساياسي مالىمدەمە جاساعان!..
ول ءوز كەۋدەسىن ۇرعىلاپ كىجىنە سويلەپ، م. بەستاەۆتىڭ سوزدەرىن قازاق فاشيستەرى يدەولوگياسىنىڭ ءبىر كورىنىسى رەتىندە سيپاتتاپ، ساياسي باعا بەردى!.. قازاقستان پرەزيدەنتى اكىمشىلىگى، «نۇر وتان» مەن كوممۋنيستەر پارتيالارى، ىشكى ساياسات باسقارمالارى، ۇلتتىق قاۋىپسىزدىك كوميتەتى قازاق فاشيستەرىنە كوز جۇمىپ وتىر دەگەن پايىمداۋىن جاريا ەتىپ، ولاردى دا ايىپتاعان! ەسىن بىلمەگەن كەزدە «اتىڭ شىقپاسا – جەر ورتە» دەگەن ۇستانىمدى بۇلعاڭداتقان الگى اڭگۇدىكتى ءتىپتى كەزدەسۋگە شاقىرىپ، «سىباعاسىن» بەرۋگە ۋادە ەتىپتى! الماتىدا الكوگولدى ىشىمدىككە سىلقيا تويىپ الىپ، كورشىلەرىمەن توبەلەسىپ جۇرگەن «فاشيست» ماناس بەستاەۆ «انتيفاشيست» باحىتجان كوپباەۆپەن كۇش سىناسۋ ءۇشىن شىمكەنتكە بارمايتىنى بەسەنەدەن بەلگىلى ەمەس پە... (ونىڭ بۇل ارەكەتىن يۋتۋبتان كورە الاسىزدار).
وسى تۇستا ەسكە الاتىن ءبىر جايت، ءتىل جاناشىرى مارعۇلان بورانباي قازاق ءتىلىن كەلەكە قىلعان ورىسشا بەينەجازباسى ءۇشىن سول م. بەستاەۆتى جەلكەسىنەن ۇستاپ تۇرىپ حالىقتان كەشىرىم سۇراتتى ().
باحىتجان كوپباەۆ ولاي ىستەمەسە دە، تۋعان حالقىن دا عايباتتاعان سۇمەلەكتى ۇلتتىق-فاشيستىك يدەولوگيانى تاراتۋشى ساياسي راديكالدى ۇيىمنىڭ كورنەكتى وكىلى سياقتى سيپاتتاپ الەۋمەتتىك جەلىدەن جار سالدى! ونىسىن تۇسىنەمىز، وزىنە ساياسي بەدەل جيناۋدى كوزدەگەن «انتيفاشيست» كوشەدە جۇرگەن الكوگوليكتەرمەن كۇرەسكە تۇسپەيدى عوي...
ايتسە دە، رەسەيدە ءفاشيزمدى اشىق دارىپتەپ، ورىس ەمەس ۇلتتاردىڭ، اسىرەسە ورتا ازيا، قازاقستان، كاۆكاز حالىقتارى وكىلدەرىن قوعامدىق ورىنداردا اياۋسىز ۇرىپ-سوعىپ، ءتىپتى ءولتىرىپ كەتەتىن سكينحەدتەر جايىندا اتىشۋلى «ءانتيفاشيستىڭ» ءبىر اۋىز ءسوز ايتپاۋى بىزگە تۇسىنىكسىز.
ارىپتەسى اننا نەۆسكايا دا باحىتجان كوپباەۆتىڭ وسىنداي ءىس-ارەكەتتەرىن تۇسىنبەۋىنە بايلانىستى ونىمەن ىستەس بولۋدان باس تارتقان سياقتى. ايتەۋىر، ول فەيسبۋك پاراقشاسىندا ينتەرناتسيوناليستەر قوزعالىسىنىڭ نۇر-سۇلتان، الماتى، اتىراۋ، قاراعاندى، قوستاناي، كوكشەتاۋ، بالقاش، پەتروپاۆەل، شىمكەنت قالالارى فيليالدارىنىڭ دا ب. كوپباەۆتىڭ ۇيىمىنان بولەكتەنىپ، باسقا باعىتتا جۇمىس ىستەيتىنىن جازىپتى.
سولاي بولا تۇرا، باقىتجان كوپباەۆ كەرەكۋگە كەلگەن ساپارىندا ءوزى كوسەمدىك ەتىپ جۇرگەن «ينتەرناتسيوناليستەردىڭ قازاقستاندىق قوعامى» ۇيىمىنىڭ وبلىستىق فيليالىن قۇرعانىن ايتتى. دەمەك، الداعى ۋاقىتتا ول كەرەكۋدەن «قازاق فاشيستەرىن» انىقتاپ، سولارعا قارسى سوعىس جاريالايتىنى جونىندە مالىمدەمە جاساسا، تاڭ قالمايمىز...
ارمان قاني،
پاۆلودار قالاسى.
Басқалармен бөлісе отырыңыз
پىكىرلەر
