قىزىلوردا وبلىسى تاسبوگەت كەنتىندە تۇراتىن كوزدىباەۆتار اۋلەتى جاڭا جىل مەرەكەسى قارساڭىندا تاعى دا ءبىر جانعا تولىقتى. جاسى ءالى وتىزعا جەتپەگەن دينارا اياجان ەسىمدى جەتىنشى نارەستەسىن قۇشاعىنا العان دەپ جازادى baq.kz اقمەشىت اپتالىعىنا سىلتەمە جاساپ.
ۇلكەن ومىرگە 17 جاسىندا قادام باسقان دينارا بۇگىندە ءابدىنۇر، جانسەزىم، رۇستەم، جاننۇر، دامير، ارۋجان، اياجان ەسىمدى بالاقايلاردىڭ اناسى.
“جولداسىم رينات ەكەۋمىزدىڭ وتاۋ قۇرعانىمىزعا بيىل 10 جىل تولادى. اتا-ەنەمىزبەن بىرگە 11 جان ءبىر شاڭىراق استىندا تاتۋ-ءتاتتى عۇمىر كەشىپ كەلەمىز. بالالارىمنىڭ سانىن ايتىپ ەشقاشان كوپسىنگەن ەمەسپىن. لايىم، قۇدايىم كوپ كورمەسىن”، – دەپ باستادى اڭگىمەسىن ول.
ءبىر قىزىعى، دينارانىڭ ۇلكەن ەنەسى دۇنيەدەن وزار الدىندا بوساعادان جاڭا اتتاعان جاس كەلىنىنە ىرىم ەتىپ، ءوزىنىڭ كۇمىس القاسىن سىيعا تارتىپتى. ومىرىندە 9 قۇرساق كوتەرىپ، ۇلىن ۇياعا، قىزىن قياعا قوندىرعان كەيۋانا جولىمدى بەرسىن دەپ وسىلاي باتا بەرىپ كەتكەن كورىنەدى. كەلىنىنىڭ دە سول ءىزدى ۇزبەي جالعاپ كەلە جاتقانىن ءوزىنىڭ ەنەسى كابيرا ريزاشىلىقپەن ايتتى.
«قۇدايدىڭ بەرمەگەنىن تارتىپ الا المايسىڭ» دەگەن. مەن ءبىر بالا عانا سۇيگەن جانمىن. ەسەسىنە، قۇدايعا شۇكىر، جالعىز بالامنان تاراعان نەمەرەلەرىمنىڭ قىزىعىنا تويماي كەلەمىن. ۇلكەن ەنەم سىرقاتتانىپ، ءفاني دۇنيەدەن وتەر الدىندا نەمەرەسى ريناتتى ۇيلەندىرىپ، كەلىنىنە ءوز قولىمەن كۇمىس القاسىن بەرگەنى بار ەدى. دينارا اجەسىنىڭ سول ءۇمىتىن اقتادى”، – دەدى كابيرا اپا.
ال مەملەكەتتىڭ بەرەتىن كۇمىس القاسىنا دينارا وسى قاڭتار ايىندا قول جەتكىزبەكشى. اسىپ-تاسقان تۇرمىس بولماسا دا، نەسىبەسى ورتايماعان قاراپايىم وتباسى باقىتتىڭ كىلتىن بالالارىندا دەپ بىلەدى. بۇل وتباسىنىڭ اسىراۋشىسى رينات ەلەكتريك بولىپ جۇمىس جاسايدى. ال، بالالاردىڭ تاربيەسىمەن تىكەلەي ءۇيدىڭ اقىلشىسى كابيرا اپا اينالىسادى ەكەن.
ءسوز سوڭىندا جاس انا بالا سانىڭ 10-عا جەتكىزۋ ويىندا بار ەكەنىن دە جاسىرمادى.
"اقمەشىت" اپتالىعى
