Qyzylorda oblysy Tasböget kentınde tūratyn Közdıbaevtar äuletı jaŋa jyl merekesı qarsaŋynda taǧy da bır janǧa tolyqty. Jasy älı otyzǧa jetpegen Dinara Aiajan esımdı jetınşı närestesın qūşaǧyna alǧan dep jazady baq.kz Aqmeşıt aptalyǧyna sılteme jasap.
Ülken ömırge 17 jasynda qadam basqan Dinara bügınde Äbdınūr, Jansezım, Rüstem, Jannūr, Damir, Arujan, Aiajan esımdı balaqailardyŋ anasy.
“Joldasym Rinat ekeumızdıŋ otau qūrǧanymyzǧa biyl 10 jyl tolady. Ata-enemızben bırge 11 jan bır şaŋyraq astynda tatu-tättı ǧūmyr keşıp kelemız. Balalarymnyŋ sanyn aityp eşqaşan köpsıngen emespın. Laiym, Qūdaiym köp körmesın”, – dep bastady äŋgımesın ol.
Bır qyzyǧy, Dinaranyŋ ülken enesı dünieden ozar aldynda bosaǧadan jaŋa attaǧan jas kelınıne yrym etıp, özınıŋ kümıs alqasyn syiǧa tartypty. Ömırınde 9 qūrsaq köterıp, ūlyn ūiaǧa, qyzyn qiiaǧa qondyrǧan keiuana jolymdy bersın dep osylai bata berıp ketken körınedı. Kelınınıŋ de sol ızdı üzbei jalǧap kele jatqanyn özınıŋ enesı Kabira rizaşylyqpen aitty.
«Qūdaidyŋ bermegenın tartyp ala almaisyŋ» degen. Men bır bala ǧana süigen janmyn. Esesıne, Qūdaiǧa şükır, jalǧyz balamnan taraǧan nemerelerımnıŋ qyzyǧyna toimai kelemın. Ülken enem syrqattanyp, fäni dünieden öter aldynda nemeresı Rinatty üilendırıp, kelınıne öz qolymen kümıs alqasyn bergenı bar edı. Dinara äjesınıŋ sol ümıtın aqtady”, – dedı Kabira apa.
Al memlekettıŋ beretın kümıs alqasyna Dinara osy qaŋtar aiynda qol jetkızbekşı. Asyp-tasqan tūrmys bolmasa da, nesıbesı ortaimaǧan qarapaiym otbasy baqyttyŋ kıltın balalarynda dep bıledı. Būl otbasynyŋ asyrauşysy Rinat elektrik bolyp jūmys jasaidy. Al, balalardyŋ tärbiesımen tıkelei üidıŋ aqylşysy Kabira apa ainalysady eken.
Söz soŋynda jas ana bala sanyŋ 10-ǧa jetkızu oiynda bar ekenın de jasyrmady.
"Aqmeşıt" aptalyǧy
