ەلوردادا «بالا بالۋان» رەسپۋبليكالىق ءتۋرنيرى وتەدى

403

قازاقستان رەسپۋبليكاسىنىڭ قازاق كۇرەسى فەدەراتسياسىنىڭ پرەزيدەنتى - اقپارات جانە قوعامدىق دامۋ ءمينيسترى داۋرەن اباەۆ فەدەراتسيانىڭ بيىلعى جۇمىس جوسپارىمەن ءبولىستى، دەپ حابارلايدى قازاقپارات ءتىلشىسى.

«قازىر قازاق كۇرەسىنىڭ اتاۋىن وزگەرتۋ ماسەلەسى ءجيى تالقىلانىپ ءجۇر. وسى رەتتە ءبىز زەرتتەۋشى عالىمدار توبىنا قازاق كۇرەسىنە قاتىستى تەرميندەردى جۇيەلەۋدى تاپسىرىپ وتىرمىز. سونىمەن قاتار، تورەشىلەر مەن جاتتىقتىرۋشىلارعا ارنالعان عىلىمي-ادىستەمەلىك نۇسقاۋلىقتار جارىق كورەدى. قازاق كۇرەسىنىڭ ەرەجەسى جيناقتالعان ۆيدەونۇسقاۋلىق ءتۇسىرىلىپ جاتىر. ول جەردە ءاربىر ءادىس بۇگە-شۇگەسىنە دەيىن ۆيدەومەن كورسەتىلەدى. ونى بارلىق باپكەرلەر مەن سپورتشىلار، ءتىپتى شالعاي اۋىلدارداعى تۇرعىندار دا كورىپ، جاتتىعۋعا پايدالانۋعا بولادى. جىل اياعىنا دەيىن بارلىق وڭىرلەردەگى قازاق كۇرەسىنە قاتىستى ماسەلەلەر زەرتتەلىپ، دامۋ كارتاسى جاسالادى. سوعان سايكەس جۇمىس جوسپارىن تولىقتىرىپ وتىرامىز. ءبىز ۇلتتىق كۇرەستى الەمگە تانىتۋ ءۇشىن ءوز ەلىمىزدەگى ناسيحاتىن كۇشەيتۋىمىز كەرەك. وسى جەردە باق وكىلدەرىنىڭ جۇمىسى ءبىز ءۇشىن وتە ماڭىزدى. ۇلتتىق كۇرەستى قازاقستاندىق مەديانىڭ باستى تاقىرىبىنا اينالدىرۋ ارقىلى ءبىز الەمدىك بيىككە جاقىندايمىز»، - دەدى ول وكق-دا وتكەن ءباسپاسوز ءماسليحاتىندا. مينيستر قازاقتىڭ ءتول سپورتىن الەمگە تانىتۋدا ءاربىر قازاقستاندىق ءوز ۇلەسىن قوسار دەگەن سەنىم ءبىلدىردى. سونداي-اق، ول فەدەراتسيا وتكىزەتىن بيىلعى تۋرنير جايلى بايان ەتتى. اتاپ ايتقاندا، بيىل قازاقستاننىڭ بارلىق ايماعىنان بالالار اراسىندا «بالا بالۋان» رەسپۋبليكالىق ءتۋرنيرى (نۇر-سۇلتان، «جەكپە-جەك» سارايى، 18 ءساۋىر), «حالىق بارىسى» رەسپۋبليكالىق ءتۋرنيرى (الماتى «سۇڭقار» حالىقارالىق ترامپليندەر كەشەنى), 30-31 مامىر ارالىعىندا «قازاقستان بارىسى» رەسپۋبليكالىق ءتۋرنيرى (نۇر-سۇلتان ق.«جەكپە-جەك» سارايى، 4 شىلدە), ەرەسەكتەر اراسىندا قر چەمپيوناتى (اتىراۋ ق. 9-13 قاراشا), «ەۋرازيا بارىسى» الەم كۋبوگى (الماتى ق. «الماتى ارەنا» مۇز سارايى، 2 جەلتوقسان) وتەدى.

 

پىكىرلەر