8 مىڭ قازاقستان ازاماتى ەلگە قايتارىلدى

8977

جامبىل وبلىسى قورداي اۋدانىندا بولعان جاپپاي تارتىپسىزدىكتەر كەزىندە باسساۋعالاپ كورشى قىرعىزستان اۋماعىنا ءوتىپ كەتكەن 8 مىڭعا جۋىق قازاقستاندىق ەلگە قايتارىلدى. بۇل تۋرالى بۇگىن نۇر-سۇلتانداعى ۇكىمەت وتىرىسىندا جامبىل وبلىسىنىڭ اكىمى بەردىبەك ساپارباەۆ حابارلادى. اكىم وبلىستاعى قازىرگى جاعدايدى "تۇراقتى" دەپ سيپاتتادى دەپ حابارلايدى "ازاتتىق" راديوسى.

"ەكى كۇننىڭ ىشىندە سەگىز مىڭعا جۋىق ازامات (قىرعىزستاننان قازاقستانعا) قايتارىلدى. كەشەدەن باستاپ مەكتەپ، بالاباقشانىڭ بارلىعى بۇرىنعىداي جۇمىس ىستەپ جاتىر. بارلىق ساۋدا دۇكەندەرى دە جۇمىسىن باستادى" دەدى ول.

سونىمەن بىرگە ساپارباەۆ قوردايداعى وقيعالار كەزىندە 19 پوليتسيا قىزمەتكەرى زارداپ شەككەنىن ايتتى.

"بەس كۇننىڭ ىشىندە دارىگەردىڭ كومەگىنە 141 ادام جۇگىنگەن، سونىڭ 19-ى – قۇقىق قىزمەتكەرلەرى. ون ادام قازا تاپتى. قۇربان بولعانداردىڭ بارلىعىنىڭ وتباسىنا جاردەم كورسەتىلىپ جاتىر" دەدى اكىم.

ساپارباەۆتىڭ ايتۋىنشا، قازىرگى كەزدە قورداي اۋداندىق اۋرۋحاناسىندا 13 ادام ەمدەلىپ جاتىر، تاعى 20 ادام – الماتى اۋرۋحاناسىنا جاتقىزىلعان. بۇعان قوسا شەنەۋنىك قىرعىزستان اۋرۋحاناسىنداعى قازاقستاندىقتاردىڭ ەلگە جەتكىزىلگەنىن حابارلادى.

"قىرعىزستاندا بولعان ادامداردى الماتى مەن تارازعا جەتكىزدىك. قازىر وندا (قىرعىزستاندا – رەد.) ەشكىم قالعان جوق" دەدى اكىم.

ۇكىمەت وتىرىسىنان كەيىن جۋرناليستەر ساۋالىنا جاۋاپ بەرگەن وبلىس اكىمى قازىرگى ۋاقىتتا قورداي اۋدانىندا جاپپاي قاقتىعىس سالدارىنان كەلگەن شىعىن كولەمى انىقتالىپ جاتقانىن، ونىڭ ەسەبى شىققان سوڭ زيان شەككەندەردە وتەماقى تولەۋ تۋرالى ۇكىمەتكە ۇسىنىس ەنگىزىلەتىنىن مالىمدەدى.

قوردايداعى وقيعالار مەملەكەتتىڭ الەۋمەتتىك ساياساتى ءساتسىز بولعانىن بىلدىرمەي مە دەگەن ساۋالعا ساپارباەۆ "الەۋمەتتىك ساياسات ەشقانداي ءساتسىز بولعان جوق، بۇل قازاقستاندا عانا ەمەس، باسقا ەلدەردە دە بولاتىن جاعداي" دەپ جاۋاپ بەردى. ساپارباەۆ وقيعانى "ۇلتارالىق قاقتىعىس" دەگەن سيپاتتاۋمەن كەلىسپەيتىنىن ايتتى. "بۇل جەردە ۇلتارالىق ماسەلە جوق، بۇل تۇرمىستىق داۋدان تۋىندادى، جاقىن ارادا ناقتى ءبىر شەشىم شىعارىپ، ءتيىستى شارا قولدانامىز" دەدى وبلىس اكىمى.

دۇيسەنبى كۇنى قازاقستان پرەزيدەنتىنىڭ جارلىعىمەن پرەمەر-ءمينيستردىڭ ورىنباسارى قىزمەتىندەگى بەردىبەك ساپارباەۆ جامبىل وبلىسىنىڭ اكىمى بولىپ تاعايىندالعان. 11 اقپاندا ساپارباەۆ جامبىل وبلىسىنداعى جاپپاي قاقتىعىستاردان كەيىن قۇرىلعان ۇكىمەتتىڭ ارنايى كوميسسياسىنىڭ جەتەكشىسى بولىپ قالاتىنىن ايتتى.

اقپاننىڭ 8-ىنە قاراعان ءتۇنى جامبىل وبلىسى قورداي اۋدانىندا بولعان جاپپاي قاقتىعىستار سالدارىنان، رەسمي دەرەك بويىنشا، 10 ادام قازا تاۋىپ، ونداعان ادام جارالاندى. جاپپاي تارتىپسىزدىكتەر قىرعىزستانمەن شەكاراعا جاقىن ورنالاسقان، نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارىندا بولعان. جانجال بارىسىندا تۇرعىندار مەنشىگىندەگى ونداعان عيمارات پەن وزگە دە دۇنيە-مۇلىك ورتەنىپ، بۇلىنگەن.

جانجالدان سوڭ مىڭداعا ادام قازاقستاننان قىرعىزستانعا قاشىپ وتكەن. 9 اقپاندا قازاقستان بيلىگى قىرعىزستانعا ءوتىپ كەتكەندەردىڭ كەيبىرى ۇيلەرىنە ورالا باستاعانىن مالىمدەدى.

حالىقارالىق باسىلىمدار ەتنيكالىق قاقتىعىس دەپ سيپاتتاعان جانجالدان كەيىن ۇكىمەت ارنايى كوميسسيا قۇرىپ، اۋداندا توتەنشە جاعداي جاريالاندى. بيلىك قوردايداعى وقيعالاردى "تۇرمىستىق جانجال" دەپ اتاپ، وعان بايلانىستى 25 قىلمىستىق ءىس قوزعالعانىن حابارلادى.

 

پىكىرلەر