8 myŋ Qazaqstan azamaty elge qaitaryldy

Jambyl oblysy Qordai audanynda bolǧan jappai tärtıpsızdıkter kezınde bassauǧalap körşı Qyrǧyzstan aumaǧyna ötıp ketken 8 myŋǧa juyq qazaqstandyq elge qaitaryldy. Būl turaly bügın Nūr-Sūltandaǧy ükımet otyrysynda Jambyl oblysynyŋ äkımı Berdıbek Saparbaev habarlady. Äkım oblystaǧy qazırgı jaǧdaidy "tūraqty" dep sipattady dep habarlaidy "Azattyq" radiosy. "Ekı künnıŋ ışınde segız myŋǧa juyq azamat (Qyrǧyzstannan Qazaqstanǧa) qaitaryldy. Keşeden bastap mektep, balabaqşanyŋ barlyǧy būrynǧydai jūmys ıstep jatyr. Barlyq sauda dükenderı de jūmysyn bastady" dedı ol. Sonymen bırge Saparbaev Qordaidaǧy oqiǧalar kezınde 19 polisiia qyzmetkerı zardap şekkenın aitty. "Bes künnıŋ ışınde därıgerdıŋ kömegıne 141 adam jügıngen, sonyŋ 19-y – qūqyq qyzmetkerlerı. On adam qaza tapty. Qūrban bolǧandardyŋ barlyǧynyŋ otbasyna järdem körsetılıp jatyr" dedı äkım. Saparbaevtyŋ aituynşa, qazırgı kezde Qordai audandyq auruhanasynda 13 adam emdelıp jatyr, taǧy 20 adam – Almaty auruhanasyna jatqyzylǧan. Būǧan qosa şeneunık Qyrǧyzstan auruhanasyndaǧy qazaqstandyqtardyŋ elge jetkızılgenın habarlady. "Qyrǧyzstanda bolǧan adamdardy Almaty men Tarazǧa jetkızdık. Qazır onda (Qyrǧyzstanda – red.) eşkım qalǧan joq" dedı äkım. Ükımet otyrysynan keiın jurnalister saualyna jauap bergen oblys äkımı qazırgı uaqytta Qordai audanynda jappai qaqtyǧys saldarynan kelgen şyǧyn kölemı anyqtalyp jatqanyn, onyŋ esebı şyqqan soŋ ziian şekkenderde ötemaqy töleu turaly ükımetke ūsynys engızıletının mälımdedı. Qordaidaǧy oqiǧalar memlekettıŋ äleumettık saiasaty sätsız bolǧanyn bıldırmei me degen saualǧa Saparbaev "äleumettık saiasat eşqandai sätsız bolǧan joq, būl Qazaqstanda ǧana emes, basqa elderde de bolatyn jaǧdai" dep jauap berdı. Saparbaev oqiǧany "ūltaralyq qaqtyǧys" degen sipattaumen kelıspeitının aitty. "Būl jerde ūltaralyq mäsele joq, būl tūrmystyq daudan tuyndady, jaqyn arada naqty bır şeşım şyǧaryp, tiıstı şara qoldanamyz" dedı oblys äkımı. Düisenbı künı Qazaqstan prezidentınıŋ jarlyǧymen premer-ministrdıŋ orynbasary qyzmetındegı Berdıbek Saparbaev Jambyl oblysynyŋ äkımı bolyp taǧaiyndalǧan. 11 aqpanda Saparbaev Jambyl oblysyndaǧy jappai qaqtyǧystardan keiın qūrylǧan ükımettıŋ arnaiy komissiiasynyŋ jetekşısı bolyp qalatynyn aitty. Aqpannyŋ 8-ıne qaraǧan tünı Jambyl oblysy Qordai audanynda bolǧan jappai qaqtyǧystar saldarynan, resmi derek boiynşa, 10 adam qaza tauyp, ondaǧan adam jaralandy. Jappai tärtıpsızdıkter Qyrǧyzstanmen şekaraǧa jaqyn ornalasqan, negızınen etnikalyq düngender tūratyn Masanchi, Sortöbe, Auqatty auyldarynda bolǧan. Janjal barysynda tūrǧyndar menşıgındegı ondaǧan ǧimarat pen özge de dünie-mülık örtenıp, bülıngen. Janjaldan soŋ myŋdaǧa adam Qazaqstannan Qyrǧyzstanǧa qaşyp ötken. 9 aqpanda Qazaqstan bilıgı Qyrǧyzstanǧa ötıp ketkenderdıŋ keibırı üilerıne orala bastaǧanyn mälımdedı. Halyqaralyq basylymdar etnikalyq qaqtyǧys dep sipattaǧan janjaldan keiın ükımet arnaiy komissiia qūryp, audanda tötenşe jaǧdai jariialandy. Bilık Qordaidaǧy oqiǧalardy "tūrmystyq janjal" dep atap, oǧan bailanysty 25 qylmystyq ıs qozǧalǧanyn habarlady.