الماتى پوليتسياسى تارتىپسىزدىكتەرگە جانە ازاماتتارعا زورلىق-زومبىلىق جاساۋعا شاقىرعانى ءۇشىن ەكى ادامدى قىلمىستىق جاۋاپكەرشىلىككە تارتتى دەپ حابارلايدى Sputnik.
ولاردى پوليتسيا دەپارتامەنتى جەدەل ءبولىمىنىڭ قىزمەتكەرلەرى انىقتادى.
"بۇرىن قاراقشىلىق جاساعانى ءۇشىن سوتتالعان، 1990 جىلى تۋعان و. جانە 1987 جىلى تۋعان س. تانىمال مەسسەندجەرلەر مەن الەۋمەتتىك جەلىلەر ارقىلى ادامداردى كوپ جينالاتىن جەرگە جينالىپ، زاڭسىز ارەكەتتەر جاساۋعا شاقىرعان", - دەپ حابارلادى پوليتسيا دەپارتامەنتىنىڭ ءباسپاسوز قىزمەتى. پوليتسيا ولار زاڭعا قايشى قانداي ارەكەتتەر جاساماقشى بولعانىن ناقتىلامادى.
كۇدىكتىلەرگە قازاقستان قىلمىستىق كودەكسىنىڭ 272-بابىنىڭ 3-بولىگى "جاپپاي تارتىپسىزدىكتەر" بويىنشا ايىپ تاعىلۋدا. سوتقا دەيىنگى تەرگەۋ باستالىپ، ءتيىستى ساراپتامالار جۇرگىزىلۋدە.
ەگەر كۇدىكتىلەردىڭ كىناسى دالەلدەنسە، ولار ءۇش جىلعا دەيىن باس بوستاندىعىنان شەكتەلۋى نەمەسە ءدال سول مەرزىمگە باس بوستاندىعىنان ايىرىلۋى مۇمكىن.
پوليتسيا ازاماتتاردى ارانداتۋشىلىققا بوي الدىرماۋعا، سونداي-اق كۇماندى دەرەككوزدەردەن الىنعان جالعان اقپاراتتى تاراتپاۋعا جانە تەك رەسمي اقپاراتتى باسشىلىققا الۋعا شاقىردى.
ەستەرىڭىزگە سالا كەتەيىك، 8 اقپاندا جامبىل وبلىسىنىڭ كورداي اۋدانىنداعى جاپپاي توبەلەس كەزىندە الماتىداعى نەگىزىنەن دۇنگەندەر ساۋدا جاسايتىن بازار جابىلدى. قازىرگى ۋاقىتتا بازارلار كۇزەتكە الىنىپ، جارتىلاي جۇمىس ىستەپ جاتىر.
قوردايداعى قاقتىعىس
7 اقپاندا قورداي اۋدانىنىڭ ماسانچي اۋىلىندا جاپپاي توبەلەس بولىپ، ونىڭ سوڭى تارتىپسىزدىككە ۇلاسقان. 8 اقپاندا قورداي اۋدانىندا جەرگىلىكتى اۋقىمدا تەحنوگەندى سيپاتتاعى توتەنشە جاعداي رەجيمى جاريالاندى.
7 اقپاندا قورداي اۋدانىنىڭ قاراكەمەر، ماسانچي، بۇلار باتىر اۋىلدارىندا 176 ادام مەديتسينالىق كومەككە جۇگىندى، 41-ءى اۋرۋحاناعا جاتقىزىلدى. ون ادام كوز جۇمدى.
زارداپ شەككەندەرگە 39 دارىگەر كومەك كورسەتىپ جاتىر، مارقۇمداردىڭ وتباسىلارىنا كومەك كورسەتۋ شارالارى قولعا الىندى. قىلمىستىق كودەكستىڭ 272-بابى (جاپپاي تارتىپسىزدىكتەردى ۇيىمداستىرۋ جانە قاتىسۋ) مەن 99-بابى (ادام ءولتىرۋ) بويىنشا سوتقا دەيىنگى تەرگەۋ شارالارى جۇرگىزىلىپ جاتىر.
