ۆولونتەرلىك – ەل مەن قوعام ءۇشىن ادال قىزمەت. ول حالقىمىزدىڭ ءومىر سالتىنا اينالۋى ءتيىس. مەملەكەت باسشىسى قاسىم-جومارت توقاەۆ ەلوردادا ۆولونتەرلەردىڭ الدىندا وسىلاي دەدى، دەپ حابارلايدى قازاقپارات ءتىلشىسى.
«ۆولونتەرلەر كۇن سايىن ماڭىزدى ءارى اۋقىمدى جۇمىس اتقارىپ كەلەدى. سول ارقىلى قازاقستاننىڭ ءوسىپ-وركەندەۋىنە ۇلەس قوساسىزدار. ەلىمىزدىڭ ءار وڭىرىندە ۆولونتەر بولۋعا نيەتتى ازاماتتاردىڭ كوپ ەكەنىنە سەنىمدىمىن. ۇكىمەت ولارعا قولداۋ كورسەتۋ ءۇشىن ناقتى شارالاردى قابىلدايدى. ءبىز بۇعان زور ءمان بەرەمىز»، - دەدى پرەزيدەنت ەلورداداعى «Birgemiz» رەسپۋبليكالىق فرونت-كەڭسەسىنىڭ اشىلۋ سالتاناتىندا. قاسىم-جومارت توقاەۆ ءوز سوزىندە ۆولونتەرلىك – كەزەكتى ناۋقان ەمەس ەكەنىن اتاپ ءوتتى. «وسىنى حالىققا ءتۇسىندىرۋىمىز كەرەك. ەرىكتىلىك – ەل مەن قوعام ءۇشىن ادال قىزمەت. ۆولونتەرلىك – حالقىمىزدىڭ ءومىر سالتىنا اينالۋى قاجەت. ونى تاۋەلسىز قازاقستاننىڭ بۇگىنگى جانە بولاشاق سيپاتى رەتىندە دارىپتەۋىمىز كەرەك. ەرىكتىلەردىڭ بويىنداعى قايرات-جىگەر – ءار ازاماتتى ىنتالاندىرۋى ءتيىس. ەلىمىزدەگى ءار اۋىل-ايماق وسى ماڭىزدى جۇمىستان تىس قالمايدى دەپ سەنەمىن. بۇل، ەڭ الدىمەن، وركەنيەتتى ەلدىڭ جانە زور جاۋاپكەرشىلىكتىڭ بەلگىسى. عۇلاما اباي «ادامزاتتىڭ ءبارىن ءسۇي باۋىرىم دەپ» بارشامىزعا وسيەت قالدىردى»، - دەدى مەملەكەت باسشىسى. قر پرەزيدەنتتىڭ ايتۋىنشا، ۆولونتەر بولۋ – جۇرەكتىڭ ءىسى، ياعني شىنايى نيەتتىڭ كورىنىسى. «سەندەر قولعا العان جۇمىستاردىڭ ءبارى ءدال وسىنداي مەيىرىمدىلىكتىڭ جارقىن ۇلگىسى بولارىنا كۇمانىم جوق. مەن ۆولونتەر جىلىندا ەڭ الدىمەن، ەلىمىزدىڭ جاستارىنا زور سەنىم ارتامىن. ءاردايىم ابىرويلى ءارى تابىستى بولىڭىزدار. ءبارىمىز بىرگە بولايىق»، - دەدى ول. ايتا كەتسەك، بۇگىن پرەزيدەنت قاسىم-جومارت توقاەۆ ەلوردادا ەكسپو كورمەسىنىڭ «Art Hub» پاۆيلونىندا ورنالاسقان ۆولونتەرلەردىڭ «Birgemiz» رەسپۋبليكالىق فرونت-كەڭسەسىنىڭ اشىلۋ سالتاناتىنا قاتىستى. فرونت-كەڭسە بۇكىل قازاقستاننىڭ ۆولونتەرلەرى ءۇشىن كەڭەس بەرۋ، ادىستەمەلىك، وقىتۋ جانە اقپاراتتىق ورتالىققا اينالاتىن بولادى. سونداي-اق، ول ۆولونتەرلىك جوبالار مەن وقىتۋ باعدارلامالارىن ۇيلەستىرۋ، مونيتورينگ جاساۋ، ۆولونتەرلىكتى ىلگەرىلەتۋ بويىنشا بىرىڭعاي اقپاراتتىق ساياساتتى جۇرگىزەدى جانە بىرىڭعاي Call-ورتالىقتىڭ جۇمىسىن ۇيىمداستىرادى.
