Memleket basşysy: Ükımet volonterlerge naqty qoldau şaralaryn qabyldaidy

Volonterlık – el men qoǧam üşın adal qyzmet. Ol halqymyzdyŋ ömır saltyna ainaluy tiıs. Memleket basşysy Qasym-Jomart Toqaev elordada volonterlerdıŋ aldynda osylai dedı, dep habarlaidy QazAqparat tılşısı. «Volonterler kün saiyn maŋyzdy ärı auqymdy jūmys atqaryp keledı. Sol arqyly Qazaqstannyŋ ösıp-örkendeuıne üles qosasyzdar. Elımızdıŋ är öŋırınde volonter boluǧa niettı azamattardyŋ köp ekenıne senımdımın. Ükımet olarǧa qoldau körsetu üşın naqty şaralardy qabyldaidy. Bız būǧan zor män beremız», - dedı Prezident elordadaǧy «Birgemiz» respublikalyq front-keŋsesınıŋ aşylu saltanatynda. Qasym-Jomart Toqaev öz sözınde volonterlık – kezektı nauqan emes ekenın atap öttı. «Osyny halyqqa tüsındıruımız kerek. Erıktılık – el men qoǧam üşın adal qyzmet. Volonterlık – halqymyzdyŋ ömır saltyna ainaluy qajet. Ony täuelsız Qazaqstannyŋ bügıngı jäne bolaşaq sipaty retınde därıpteuımız kerek. Erıktılerdıŋ boiyndaǧy qairat-jıger – är azamatty yntalandyruy tiıs. Elımızdegı är auyl-aimaq osy maŋyzdy jūmystan tys qalmaidy dep senemın. Būl, eŋ aldymen, örkeniettı eldıŋ jäne zor jauapkerşılıktıŋ belgısı. Ǧūlama Abai «Adamzattyŋ bärın süi bauyrym dep» barşamyzǧa ösiet qaldyrdy», - dedı Memleket basşysy. QR Prezidenttıŋ aituynşa, volonter bolu – jürektıŋ ısı, iaǧni şynaiy niettıŋ körınısı. «Sender qolǧa alǧan jūmystardyŋ bärı däl osyndai meiırımdılıktıŋ jarqyn ülgısı bolaryna kümänım joq. Men Volonter jylynda eŋ aldymen, elımızdıŋ jastaryna zor senım artamyn. Ärdaiym abyroily ärı tabysty bolyŋyzdar. Bärımız bırge bolaiyq», - dedı ol. Aita ketsek, bügın Prezident Qasym-Jomart Toqaev elordada EKSPO körmesınıŋ «Art Hub» pavilonynda ornalasqan volonterlerdıŋ «Birgemiz» respublikalyq front-keŋsesınıŋ aşylu saltanatyna qatysty. Front-keŋse bükıl Qazaqstannyŋ volonterlerı üşın keŋes beru, ädıstemelık, oqytu jäne aqparattyq ortalyqqa ainalatyn bolady. Sondai-aq, ol volonterlık jobalar men oqytu baǧdarlamalaryn üilestıru, monitoring jasau, volonterlıktı ılgerıletu boiynşa bıryŋǧai aqparattyq saiasatty jürgızedı jäne bıryŋǧai Call-ortalyqtyŋ jūmysyn ūiymdastyrady.