قورداي اۋدانى ماسانچي اۋىلىندا ادامنىڭ ءمايىتى تابىلدى. بۇل تۋرالى "ادىرنا" پورتالى وبلىس اكىمىنىڭ كەڭەسشىسىنە سىلتەمە جاساپ حابارلايدى.
"2020 جىلدىڭ 11 اقپانىندا ساعات 12:07-دە جامبىل وبلىسى پوليتسيا دەپارتامەنتىنىڭ كەزەكشى بولىمىنە، قورداي اۋدانىنىڭ ماسانچي اۋىلىندا، ساۋدا ورتالىعى عيماراتىن (ورتتەن كەيىن شاتىردىڭ قۇلاۋى بولعان), تازارتۋ كەزىندە، قيراعان ۇيىندىلەردىڭ استىندا ادامنىڭ كۇيگەن دەنەسى تابىلدى. ءمايىتتىڭ جەكە باسىن انىقتاۋ ءۇشىن سوت-مەديتسينالىق ساراپتاما تاعايىندالدى. جەدەل الدىن-الۋ شارالارى جۇرگىزىلىپ جاتىر", - دەپ جازدى جامبىل وبلىسى اكىمىنىڭ كەڭەسشىسى قانات قۇلشمانوۆ Facebook جەلىسىندەگى پاراقشاسىندا.
"ادىرنا" ۇلتتىق پورتالى قورداي وقيعاسى كەزىندە تاعى ءبىر ادامنىڭ جوعالىپ كەتكەنىن جازعان بولاتىن. ماسانوۆ مۇرات ەسىمدى ازامات تانىستارىنىڭ ايتۋىنشا، ءبىر ءۇيدىڭ جالعىز بالاسى ەكەن. ەكى قاباتتى ۇيدەن تابىلعان ءمايىتتىڭ مۇراتتىكى بولۋ ىقتيمالدىعى 50دە50 پايىز دەيدى اۋىل تۇرعىندارى.
ەسكە سالايىق، 7 اقپاندا جامبىل وبلىسى قورداي اۋدانى ماسانچي اۋىلىندا تۇرعىندار اراسىندا جاپپاي توبەلەس بولعان ەدى. جاپپاي توبەلەسكە رەسمي دەرەك بويىنشا 300-گە جۋىق ادام قاتىسقان. شەت ەل ءباسپاسوزى وقيعانى ۇلتارالىق قاقتىعىس دەپ باعالاسا، پرەزيدەنت توقاەۆ بۇزاقىلىق دەپ اتاعان بولاتىن.
"ادىرنا" ۇلتتىق پورتالى
