قىتايمەن شەكارالاس دوستىق ستانساسىندا كوروناۆيرۋس جۇقتىردى دەگەن كۇدىككە ىلىنگەن ادامدى انىقتاۋعا باعىتتالعان وقۋ-جاتتىعۋ ءوتتى، دەپ حابارلايدى "قازاقستان تەمىر جولى" كومپانياسىنىڭ ءباسپاسوز قىزمەتى.
ستسەناري بويىنشا، الماتى – دوستىق باعىتىنداعى №13/14 جولاۋشىلار پويىزىندا ۆيرۋستىق ينفەكتسيانىڭ بەلگىلەرى بايقالعان جولاۋشى بولعان.
جوعارى تەمپەراتۋرا، جوتەل، ەنتىگۋ، جوعارعى تىنىس الۋ جولدارىنىڭ اۋىرسىنۋى سەكىلدى نەگىزگى كلينيكالىق بەلگىلەر انىقتالىپ، ەپيدەميولوگيالىق انامنەزى ەسەپكە الىنىپ، وعان بەلگىسىز ەتيولوگيانىڭ پنەۆمونياسى دەگەن الدىن الا دياگنوز قويىلدى.
"تەز ارادا بارلىق قىزمەتكە حابار بەرىلىپ، كۇزەت قويىلدى. ۆاگوندى سانيتارلىق تۇيىققا شىعارۋ ءۇشىن جولاۋشىلار ۆاگونى اعىتىلدى. دەزينفەكتسيا بريگاداسى پويىز بەن ۆيرۋس "جۇقتىرعان" ادام وتىرعان ۆاگوندى دارىمەن وڭدەدى", - دەلىنگەن حابارلامادا.
قورعانىس كوستيۋمدەرىن كيگەن ماماندار ەپيدەميولوگيالىق تەكسەرىس جۇرگىزدى. وقۋ-جاتتىعۋ كەزىندە العاشقى مەديتسينالىق كومەك كورسەتۋ، بيوماتەريالدى زەرتتەۋگە الۋ، دوستىق ستانساسىنىڭ اۋرۋحاناسىنا اۋرۋ ادامدى جەتكىزۋ مەن ەۆاكۋاتسيالاۋ بارىسى پىسىقتالدى.
بۇدان بولەك، ەپيدەميولوگتار ناۋقاستىڭ قانشا اداممەن بايلانىستا بولعانىن انىقتادى.
دوستىق ستانساسىنداعى وقۋ-جاتتىعۋلار ۇيىمداسقان تۇردە ءوتتى. ويتكەنى تەمىرجولشىلار جىل سايىن ەپيدەميولوگيالىق، شەكارالىق جانە كارانتيندىك قىزمەتتەرمەن بىرلەسىپ وسىنداي شارالاردى پىسىقتايدى، دەپ اتاپ ءوتتى قتج-دان.
Sputnik.
