قر ۇلتتىق مۋزەيىندە جامبىل جاباەۆتىڭ تۋعانىنا 170 جىل تولۋىنا وراي «جىر الىبى – جامبىل» اتتى دوڭگەلەك ۇستەل ءوتتى، دەپ حابارلايدى مۋزەيدىڭ اقپاراتتىق-يميدجدىك قىزمەتى.
دوڭگەلەك ۇستەلگە ۇلتتىق مۋزەي ديرەكتورىنىڭ ورىنباسارى جاكەن تايماعامبەتوۆ، ساكەن سەيفۋللين اتىنداعى مۋزەي ديرەكتورى نەسىپبەك ايتۇلى، فعد.، پروفەسسور قۇنىپيا الپىسباي قاتىسىپ، ءسوز سويلەدى. جيىندا ءسوز العان مۋزەي ورىنباسارى جاكەن تايماعامبەتوۆجامبىلدىڭ قازاق ادەبيەتىنە، ونىڭ ىشىندە ايتىس ونەرىنە قوسقان ۇلەسى تۋرالى ايتا وتىرىپ، جىراۋ مۇراسىنىڭ ماڭىزدىلىعىنا توقتالىپ ءوتتى.
- جامبىل جاباەۆ اتاقتى ءسۇيىنبايدىڭ شاكىرتى. ءجۇز جاساعان ابىز عاسىر ءسوزىن سويلەگەن كۇمىس كومەي اقىن. تاريح جىلناماشىسى. ايتىس ونەرىنىڭ ساڭلاعى. ونىڭ ولەڭدەرى تۇتاس ۇرانعا اينالىپ، حالىق پوەزياسىنىڭ اتاسى اتاندى. «جامبىل جىرلارى تەڭىز تۇبىندە شاشىلىپ جاتقان مارجان سىقىلدى. ونى جيناپ الىپ حالقىنىڭ قولىنا بەرۋ – ءبىزدىڭ ارقايسىمىزدىڭ ازاماتتىق بورىشىمىز» دەگەن ەكەن ساكەن سەيفۋللين. جامبىل قازاق ءسوز ونەرىنىڭ دامۋىنا ايتارلىقتاي ۇلەس قوسقان تۇلعا. ىزگىلىكتى، بىرلىكتى جىرلاعان اقىن. جامبىل بابامىز اقىندىق ونەرىن ءسان ءۇشىن ەمەس، حالىقتىڭ مۇددەسى جولىندا پايدالانعان، - دەدى ج.تايماعامبەتوۆ.
اقىن، قر مەملەكەتتىك سىيلىعىنىڭ لاۋرەاتى نەسىپبەك ايتۇلىنىڭ ايتۋىنشا، جامبىل جاباەۆتىڭ شىعارماشىلىعى كەزىندە قاتتى سىنعا ۇشىراعانىمەن، ول قاتەلىككە ەگەمەن قازاق ەلىنىڭ جاستارى بوي الدىرماۋى كەرەك.
- كەزىندە ساياسات سولاي بولدى، بىرەۋدى جازعىرۋعا ءبىزدىڭ قۇقىمىز جوق. جامبىلدىڭ كەڭەس وداعىنا قاتىستى ولەڭدەرىن بىلاي قويعاندا، قازاق حالقى ءۇشىن وزگە دە شىعارمالارى جەتىپ ارتىلادى. ايتالىق، «سۇرانشى باتىر» پوەماسىن الايىقشى. وسىنىڭ وزىندە قانشاما قۇندى دۇنيە بار. ءار ءبىر جولى دانالىققا تۇنىپ تۇر. ديىرمەننىڭ تاسىنداي ۇگىتىپ جىبەرەدى. جامبىل – قازاق باتىرلارىنىڭ ناسيحاتشىسى. جامبىل – ۇلتتىق ۇلگىدەگى اقىن. ەكى تومدىق شىعارمالار جيناعىن جاساپ شىعاردىق. وسى جۇمىستار ارى قاراي دا جالعاسىن تاباتىن بولادى، - دەدى ن. ايتۇلى.
پروفەسسور قۇنىپيا الپىسباي جامبىلتانۋ ماسەلەسىنە توقتالا كەلە، بۇگىنگى تاڭدا عىلىمي جۇمىستار بەلسەندى تۇردە جۇرگىزىلىپ جاتقانىن ايتتى.
- جامبىلدىڭ جىرلارىن وسى ۋاقىتقا دەيىن تالاي ادەبيەتشىلەر، عالىمدار زەرتتەپ كەلدى. ءالى دە جالعاسىپ جاتىر. سۇلتانعالي سادىرباەۆ، مىرزاتاي جولداسبەكوۆ، راقىمجان تۇرىسبەكوۆ سىندى زيالى ازاماتتارىمىزدىڭ جامبىل مۇراسىن تانۋداعى قوسقان ۇلەسى ءالى تالاي ۇرپاققا ازىق بولارى ءسوزسىز. مەملەكەت تاراپىنان بۇل ماسەلەگە ەرەكشە كوڭىل بولىنگەن. باستىسى – وسى جيناعانىمىزدىڭ ءبارىن شاشىپ الماي، كەيىنگى جاستارعا اماناتتاپ تاپسىرۋ، - دەدى ق.الپىسباي
سونىمەن قاتار، جيىن بارىسىندا ەۇۋ ستۋدەنتتەرى ءوز پىكىرلەرىمەن ءبولىسىپ، كوكەيلەرىندە جۇرگەن ساۋالدارىنا جاۋاپ الدى.
