الەۋمەتتىك جەلىدەن الىنعان سۋرەت
ىشكى ىستەر ءمينيسترى ەرلان تۇرعىمباەۆ قارۋمەن قاشىپ كەتكەن اسكەري قىزمەتكەر جايلى ايتتى، - دەپ حابارلايدى Tengrinews.kz ءتىلشىسى.
"كەلىسىم-شارتپەن جۇمىس ىستەيتىن سارباز قىزمەت ورنىنان تاپانشا مەن اۆتوماتتار ۇرلاپ، كەتىپ قالعان. قازىرگى ۋاقىتتا ول ۇستالدى. قارۋ-جاراقتاردى تاركىلەۋ بويىنشا تەرگەۋ شارالارى ءجۇرىپ جاتىر. بارلىق تەرگەۋ ءىس-ارەكەتتەرى اياقتالعاننان كەيىن، سونداي-اق ونىڭ سىبايلاستارى، قارۋلار قايدا جاسىرىلعانىن جانە ونىڭ قالاي الىنعانى انىقتالعاننان كەيىن، اقپاراتتى جەكە بەرەمىز. (...) ازىرگە ايتارىم ءبىر، وسى قارۋلاردان ەشكىم زارداپ شەككەن جوق", - دەدى مينيستر سەناتتا جۋرناليستەردىڭ سۇراقتارىنا جاۋاپ بەرە وتىرىپ.
ەسكە سالايىق، تۇركىستان وبلىسىندا سارباز قارۋ-جاراق الىپ، اسكەردەن قاشىپ كەتكەن. 20 اقپانعا قاراعان ءتۇنى كىشى سەرجانت قىزمەتتىك ورنىنان ءوز ەركىمەن كەتىپ قالعان.
"سول ۋاقىتتا اتىس قارۋىنىڭ سانى ازايعانى بەلگىلى بولدى. قۇقىق قورعاۋ ورگاندارى مەن اسكەري پوليتسيا كۇشىمەن اسكەري قىزمەتكەر مەن جوعالعان قارۋلاردى ىزدەۋ جانە ۇستاۋ بويىنشا شۇعىل شارالارى ءجۇرىپ جاتىر", - دەدى ۆەدومستۆوداعىلار.
Tengrinews.kz وقىرماندارى رەداكتسيانىڭ WhatsApp-نومىرىنە جىبەرگەن مالىمەت بويىنشا، وقيعا №10216 اسكەري بولىمىندە بولعان. بۇل شىمكەنتتەن 30 شاقىرىم جەردەگى بادام اۋىلى.
سول حابارلامادا 20 اقپانعا قاراعان ءتۇنى كىشى سەرجانتتىڭ قىزمەت ورنىن ءوز ەركىمەن تاستاپ كەتكەنى ايتىلادى. ول وزىمەن بىرگە 30 كالاشنيكوۆ اۆتوماتى مەن 27 ماكاروۆ تاپانشاسىن جانە 429 وق-ءدارى الىپ كەتكەن دەلىنەدى.
