بۇگىن، 27 اقپان كۇنى اقمولا وبلىسى تالاپكەر اۋىلىندا ەكى كۇن بۇرىن نۇر-سۇلتانداعى تەرگەۋ يزولياتورىندا قايتىس بولعان بەلسەندى دۋلات اعادىلدى سوڭعى ساپارعا شىعارىپ سالدى.
الماتىدان توپىراق سالۋعا بارا الماعان، قوعامدىق بەلسەندىنىڭ جۇمباق ولىمىنە اشۋلانعان جۇرتشىلىق وڭتۇستىك استانانىڭ رەسپۋبليكا الاڭىندا نارازىلىق شاراسىن وتكىزدى.
ءبىر ساعاتقا سوزىلعان قارالى ميتينگىدەن كەيىن كوپشىلىك 22 اقپان كۇنى ميتينگىدە قامالعانداردى بوساتۋ تۋرالى تالاپپەن قالالىق پروكۋراتۋرانى بەتكە الدى.
پروكۋراتۋرانىڭ الدىنداعى "پروكۋرور شىق" دەپ ايقايلاعان تالاپشىل توپقا قالا پروكۋرورىنىڭ ورىنباسارى مەن كومەكشىسى شىعىپ، بەلسەندىلەردىڭ وكىلدەرىن قابىلداۋعا، كەلىسسوز جۇرگىزۋگە ءازىر ەكەندىكتەرىن ءبىلدىردى. بىراق پروكۋروردىڭ ءوزى كەلسىن دەگەن حالىق تالابىنان كەيىن ورىنباسار مەن كومەكشى ىشكە كىرىپ كەتتى. پروكۋرور دا كوپ الدىندا بوي كورسەتپەدى.
بۇعان نارازىلىق تانىتقان جينالعان جۇرت قالالىق اكىمدىكتى بەتكە الدى. باعانادان بەرى حالىقتىڭ قيمىلىن باقىلاپ كەلە جاتقان ارنايى كولىكتەگى پوليتسيانىڭ ارنايى جاساعى اكىمدىكتىڭ الدىن قورشاپ ۇلگەردى.
جاسارال قۋانىشالين باستاعان بەلسەندىلەر "ساعىنتاەۆ شىقسىن، سوسىن بارىپ تالاپتارىن ايتاتىنىن" مالىمدەدى. اكىمدىكتىڭ وكىلى شىققانىمەن ونىمەن كەلىسسوز جۇرگىزۋدەن باس تارتقان بەلسەندىلەر اكىم شىقپاي تۇرا بەرەتىندەرىن ايتتى.
اكىمنىڭ ورنىندا جوق ەكەنىن تاعى ءبىر كەلىپ مالىمدەگەن اكىمدىكتىڭ وكىلىنىڭ سوزىنەن كەيىن دۋلات اعادىلدىڭ رۋحىنا قۇران باعىشتاعان كوپشىلىك 1 ناۋرىز كۇنى قايتادان اكىمدىك الدىنا جينالماق بولىپ تارقادى.
وڭعار قابدەن،
"ادىرنا" ۇلتتىق پورتالى
