بۇگىن، 10 ناۋرىز - قازاق كينوسىنىڭ جارىق جۇلدىزى، "قىز جىبەك" ءفيلىمى ارقىلى كۇللى قازاققا تانىلعان اكتەر قۇمان تاستانبەكوۆتىڭ تۋعان كۇنى.
قۇمان نۇرماعانۇلى تاستانبەكوۆ 1945 جىلى 10 ناۋرىزدا الماتى وبلىسى سارقانت اۋدانى ەكىاشا اۋىلىندا دۇنيەگە كەلگەن. اكتەر، قر-نىڭ حالىق ءارتيسى (1993 ج.). 1969 جىلى الماتى مەملەكەتتىك ونەر ينستيتۋتىنىڭ (قازىرگى قازاق ۇلتتىق كونسەرۆاتورياسى) اكتەرلىك فاكۋلتەتىن (ۇستازى – پروفەسسور ح.بوكەەۆا) بىتىرگەن سوڭ، قازاقتىڭ مەملەكەتتىك اكادەميالىق دراما تەاترىنىڭ قۇرامىنا قابىلداندى. ونىڭ العاش ويناعان ءرولى – “قىز جىبەك” فيلمىندەگى تولەگەن (1970 ج.). بۇدان كەيىن “قىس – مازاسىز ماۋسىم”، “اعام مەنىڭ”، “ەرەكشە كۇن”، “اققۋلار ۇشىپ كەلەدى”، “ماحاببات جاڭعىرىعى”، “اعاما ارنالعان قالىڭدىق”، “قاراشا قازدار قايتقاندا”، “پروۆينتسيالىق حيكايا”، “الاڭ شەتى”، “ورنەك”، ت.ب. فيلمدەرىنە ءتۇستى.
ول تەاتر ساحناسىندا قاسىم، قۇلبەك (ش.ايتماتوۆ، “انا – جەر-انا” مەن “اق كەمەسى”), الىبەك، نارشا، ابىز (م.اۋەزوۆ، “ايمان – شولپان”، “قاراگوز” بەن “ەڭلىك – كەبەك”), تاڭىربەرگەن ء(ا.نۇرپەيىسوۆ، “قان مەن تەر”), جان (و.بوكەەۆ، “قۇلىنىم مەنىڭ”، قازاقستان لەنين كومسومولى سىيل.، 1976), ايدار (اۋەزوۆ پەن ل.س. سوبولەۆ، “اباي”), مازداق (م.شاحانوۆ، “سەنىم پاتشالىعى”), ورەست (ل.ديۋركو، “ەلەكترا، سۇيىكتىم مەنىڭ”), فلوريدور (ف.ەرۆە، “تۇلكى بيكەش”), فارحاد (نازىم حيكمەت، “فارحاد – شىرىن”), ت.ب. سەكىلدى ءار الۋان رولدەردى سومدادى.
«قۇرمەت» وردەنىمەن ماراپاتتالعان. قازاقستان لەنين كومسومولى سىيلىعىنىڭ يەگەرى.
