الماتى قالاسى ىشكى ساياسات باسقارماسىنىڭ قولداۋىمەن «ادىرنا» ۇلتتىق-ەتنوگرافيالىق بىرلەستىگى قازاقستان-2050 «ماڭگىلىك ەل» ستراتەگياسى، مەملەكەتتىك «مادەني مۇرا» جانە «حالىق تاريح تولقىنىندا» باعدارلامالارىن جۇزەگە اسىرۋ ماقساتىندا 2016 جىلدىڭ 13 قىركۇيەگىندە الماتى قالاسىنىڭ 1000 جىلدىعىنا ارنالعان «الماتىنىڭ مىڭجىلدىق تاريحى: ارحەولوگيا جانە جازبا دەرەكتەرى» اتتى حالىقارالىق عىلىمي-تاجىريبەلىك كونفەرەنتسيا وتكىزەدى.
كونفەرەنتسيانىڭ ماقساتى – الماتى قالاسى تاريحىنىڭ كوكجيەگىن كەڭەيتۋ جانە جاڭا عىلىمي دەرەكتەردى جيناۋ، عالىمداردىڭ اتاۋلى ماسەلە بويىنشا تاجىريبە الماسۋىنا جاعداي جاساۋ، الماتىنى مىڭجىلدىقتارعا تامىر تارتقان تاريحى تەرەڭ كەنت ەكەندىگىن عىلىمي نەگىزدە دالەلدەۋ.
كونفەرەنتسياعا ارحەولوگتار، تاريحشىلار، كورنەكتى عالىمدار، قوعام قايراتكەرلەرى، قازاقستان حالىقتارىنىڭ اسسامبلەياسى مۇشەلەرى جانە تانىمال ۇەۇ وكىلدەرى قاتىسادى. اتاپ ايتقاندا باياناداماشى عالىمدار قاتارىندا ت.ع.د.، پروفەسسورلار ك. بايپاقوۆ، م. ابۋسەيىتوۆا، م. نۇرپەيىسوۆ، ا. نۇرجانوۆ، ن. بازىلحان سىندى تاريحشىلار بار.
كونفەرەنتسيانىڭ ەرەكشەلىگى – شارا بارىسىندا جادىگەرلەر مەن قولونەر بۇيىمدارى، فوتوسۋرەتتەر كورمەسى قويىلادى. سونداي-اق، الماتى ماڭىنداعى ەسىك مۋزەيىنە، تاڭبالى تاس ەسكەرتكىشتەر كەشەنىنە ەكسكۋرتسيا ۇيىمداستىرۋ جوسپارلانىپ وتىر.