قاراعاندىدا مينسكىدەن كەلگەن ۇشاقتىڭ جولاۋشىلارى ۇيلەرىنە قايتارىلدى.
كورونوۆيرۋس جۇقتىرعان ەكى جولاۋشىعا جاقىن وتىرعان جولاۋشىلار عانا كارانتيندە قالعان.
قاراعاندى جۇرتىن كەسەلدىڭ ەكى ادامنان بەلگىلى بولعاندىعى جونىندەگى اقپارات ءدۇر سىلكىندىردى. كورونوۆيرۋس سىرقاتىن جۇقتىرعان 1971 جىلعى جانە 1972 جىلعى ەكى ازامات. ولار قاراعاندى تۇرعىنى ەمەس. بۇل 18 ناۋرىزدا مينسكىدەن كەلگەن ۇشاقتان تۇسكەن جولاۋشىلار. دەنساۋلىق ساقتاۋ سالاسىنىڭ ماماندارى "قاراعاندى قالاسىنا كەسەل وتكەن جوق " دەپ وتىر.
" مينسك - نۇر - سۇلتان باعىتىمەن كەلە جاتقان ۇشاق قاراعاندىعا قونعان. ويتكەنى ءبىر مەزەتتە استاناعا ءۇش حالىقارالىق رەيس كەلىپ قونعاندىقتان ، وسىندا ۇشاقتى قوندىرۋعا شەشىم قابىلداندى. بۇگىندە ۇشاق جولاۋشىلارىنىڭ ىشىندە ەكەۋىنىڭ ۆيرۋسولوگيالىق ساراپتاما قورىتىندىسىنا ساي ، كەسەلدى جۇقتىرعانى انىقتالدى. جولاۋشىلاردى بىردەن ۇشاقتا تەكسەرىپ ، وقشاۋلاۋ ءۇشىن پروۆيزورلىق مەكەمەگە جەتكىزدىك. بۇل جولاۋشىلار قالا تۇرعىندارىمەن ارالاسقان جوق. قازىر كەسەل جۇقتىرعاندار جۇقپالى اۋرۋلار ءبولىمىنىڭ جەكە پالاتاسىنا اۋىستىرىلعان " ، - دەپ مالىمدەدى قاراعاندى وبلىسىنىڭ دەنساۋلىق ساقتاۋ باسقارماسىنىڭ باستىعى ەرجان نۇرلىباەۆ .
ازىرگە ماماندار قاراعاندى قالاسىندا كارانتين جاريالانبايدى دەيدى. سونىمەن قاتار وڭىردە بالاباقشالار جۇمىستارىن توقتاتقان جوق. اۋقىمى ەكى مىڭ شارشى الاڭنان اساتىن ءىرى ساۋدا ورىندارى جابىلعان، مۇندا تەك ازىق - تۇلىك ساتاتىن ورىندارمەن ءدارىحانالار عانا اشىق تۇر. دەنساۋلىق ساقتاۋ باسقارماسىنىڭ حابارلاۋىنشا، مينسكىدەن كەلگەن ۇشاقتا بولعان جولاۋشىلار اۋرۋدى انىقتايتىن تەستىلەۋدەن وتكەن سوڭ ۇيلەرىنە بوساتىلعان. تەك كارانتيندە كەسەل جۇقتىرعان جاندارمەن ارالاسقاندارى عانا قالىپتى. بۇگىندە وبلىس جولدارىندا التى بولىككە سانيتارلىق بەكەت قويىلعان. بۇل جەردە قاراعاندىعا باعىت العان جولاۋشىلاردىڭ دەنساۋلىعى تەكسەرىلەدى، ەگەر دەنە قىزۋى كوتەرىلگەندەر بولسا دارىگەرلەردىڭ قولىنا تاپسىرىلادى. كەشە تۇندە وسى سانيتارلىق بەكەتتەردە ەكى مىڭ كولىك توقتاتىلىپ تەكسەرۋدەن وتكەن ەكەن.
ارايلىم ەركەباەۆا
