ازىق-تۇلىكتىڭ باعاسى نە سەبەپتى بىردەن قىمباتتاپ كەتتى؟ تاۋاردىڭ جەتىسپەۋشىلىگى مە، الدە ەلدى دۇرلىكتىرگەن ىندەت كەزىندەگى ساۋداگەرلەردىڭ قالتاسىنىڭ قامىن ويلاعاندىعى ما؟
بۇگىن شىمكەنت قالاسىنىڭ اكىمى مۇرات ايتەنوۆ بىرقاتار باسقارما باسشىلارىمەن جانە «Nur Otan» پارتياسىنىڭ مۇشەلەرىمەن بىرگە «جىبەك جولى» كوتەرمە بازارىنا بارىپ، ازىق-تۇلىكتىڭ باعاسىن تەكسەردى.
ساۋدا قاتارىنداعى باعالارمەن تانىسۋعا ەسكەرتۋسىز بارعان قالا اكىمى ازىق-تۇلىكتىڭ نارقىن اسىرا ساتىپ جاتقان ساۋداگەرلەرمەن بەتپە-بەت جۇزدەستى.
ولاردىڭ ايتۋىنشا، وزگە وبلىستاردان كەلەتىن كارتوپ، ءسابىز، پياز سىندى كۇندەلىكتى تۇتىنۋعا قاجەتتى كوكونىس باعاسى شارىقتاپ تۇر.
قازىرگى قىسىلتاياڭ كەزدە مىنا تۇرعان كوكونىستەردىڭ كوتەرمە باعاسىن ەستىسەڭىز جاعاڭىزدى ۇستايسىز.
تارقاتىپ ايتار بولساق، كارتوپتىڭ ءبىر كەلىسى 150-160 تەڭگە بولسا، ءسابىز 120 تەڭگەدەن ساۋدالانۋدا.
دەگەنمەن، بازار ىشىندەگى باعالار دا ءار ءتۇرلى.
بۇگىندە «جىبەك جولى» بازارىندا 200-گە جۋىق ساۋدا نۇكتەسى بار.
تولىقتاي بازاردىڭ جاعدايىمەن تانىسقان ماماندار ساتۋشىلارعا ەسكەرتۋ جۇمىستارىن جۇرگىزدى.
ەندىگى جەردە بۇل جۇمىستار كەلەر ايدىڭ ورتاسىنا دەيىن ءوز جالعاسىن تاباتىن بولادى.
الداعى ۋاقىتتا بارلىق ساۋدا ورىندارىنداعى ازىق-تۇلىك باعالارىنا تەكسەرۋ جۇرگىزىلىپ، قالتاسىنىڭ قامىن ويلاعان ازاماتتارعا ايىپپۇل سالىناتىن بولادى.
دەرەككوز: adym.kz
