تاراز قالاسى 7 ساۋىردەن باستاپ كارانتين رەجيمىنە كوشەدى، - دەپ حابارلايدى «ادىرنا» ۇلتتىق پورتالىنىڭ ءتىلشىسى.
كارانتين رەجيمىنە بايلانىستى قالا اكىمدىگى شۇعىل دايىندىق شارالارىن جۇرگىزىپ جاتىر. اتاپ ايتقاندا، قالاعا كىرەتىن 7 پوست بەكەتىنىڭ ارقايسىسىنا 2 پالاتكادان جەتكىزىلىپ، ونداعى قىزمەتكەرلەر ازىق-تۇلىكپەن، جاتىن ورىنمەن قامتاماسىز ەتىلدى. اتالعان 7 پوست كامەرا ارقىلى قالا اكىمشىلىگىندە باقىلاۋدا بولادى.
كارانتين رەجيمىنە قاتىستى تاراز قالاسىنىڭ اكىمى ايتقازى داۋلەتقۇلۇلى جامبىل وبلىسى وڭىرلىك كوممۋنيكاتسيالار قىزمەتىندە مالىمدەمە جاسادى.
قۇرمەتتى قالا تۇرعىندارى!
تاراز قالاسىنىڭ باس مەملەكەتتىك سانيتارلىق دارىگەرىنىڭ قاۋلىسىمەن 7 ءساۋىر كۇنى ساعات 00.00-دەن باستاپ قالا اۋماعىندا كارانتين رەجيمى ەنگىزىلەدى. وسىعان بايلانىستى قالالىق اكىمدىكتىڭ جانىنان جەدەل شتاب قۇرىلدى. شتاب قۇرامىنا قالانىڭ بارلىق بولىمدەرى، پوليتسيا، سەس ماماندارى ەنگىزىلگەن. شتاب تاۋلىك بويى جۇمىس ىستەيدى جانە ارنايى جەدەل تەلەفون ىسكە قوسىلعان – 43-15-16, 45-59-85
كارانتين جاريالانعاننان كەيىن بارلىق اۆتوكولىك قۇرالدارىنىڭ جانە ازاماتتاردىڭ قالا اۋماعىنا كىرۋىنە جانە شىعۋىنا تىيىم سالىنادى. ازىق-تۇلىك تاۋارلارىن، مەديتسينالىق بۇيىمدار مەن پرەپاراتتارىن، ءبىرىنشى كەزەكتە قاجەتتى تاۋارلاردى تاسىمالدايتىن، كوكتەمگى ەگىس جۇمىستارىن جۇرگىزەتىن اۆتوكولىك قۇرالدارىنىڭ جۇرۋىنە ارنايى رۇقسات قاعازىمەن عانا رۇقسات بەرىلەدى. رۇقسات قاعازدارىن جەرگىلىكتى اكىمدىكتەن الا الاسىزدار.
قوعامدىق كولىكتەر ساعات 7-00-دەن 20-00-گە دەيىن جۇمىس ىستەيتىن بولادى.
وسىعان بايلانىستى ادامداردىڭ جانە جەكە كولىكتىڭ تاراز قالاسىنىڭ اۋماعىندا ەركىن ءجۇرىپ-تۇرۋىنا تىيىم سالىنادى:
- جۇمىس ورنىنان انىقتاما بولعان جاعدايدا تۇرعىلىقتى جەرىنەن جۇمىس ورنىنا دەيىن جانە كەرى ءجۇرىپ-تۇرۋ;
- ازىق-تۇلىك تاۋارلارىن، دارىلىك پرەپاراتتاردى جانە مەديتسينالىق بۇيىمداردى ساتىپ الۋ;
- مەديتسينالىق كومەككە جۇگىنۋ;
- مەملەكەتتىك جانە الەۋمەتتىك كومەك الۋ ماقساتىندا مەملەكەتتىك مەكەمەلەرگە بارۋ;
- كۇتپەگەن توتەنشە جاعداي جانە ادامنىڭ ءومىرى مەن دەنساۋلىعىنا قاۋىپ توندىرەتىن باسقا دا جاعدايلار كەزىندە.
بۇل رەتتە، وتباسى مۇشەلەرىن قوسپاعاندا، ادامداردىڭ 3 ادامنان ارتىق توپتاسۋىنا، سونداي-اق كامەلەتكە تولماعانداردىڭ ەرەسەكتەردىڭ ەرىپ ءجۇرۋىنسىز ءجۇرىپ-تۇرۋىنا تىيىم سالىنادى.
جەكە تۇلعالار، اۆتوكولىك جۇرگىزۋشىلەرى جەكە قورعانۋ قۇرالدارىن پايدالانۋعا مىندەتتى.
ازىق-تۇلىك سۋپەرماركەتتەرى، ازىق-تۇلىك دۇكەندەرى، ءدارىحانالار، ۆەتەريناريالىق ءدارىحانالار، اۋىل شارۋاشىلىعى تەحنيكاسىنا ارنالعان اۆتوبولشەكتەر، اۋىل شارۋاشىلىعى جانۋارلارىنا ارنالعان جەم-شوپتەردى وتكىزۋگە رۇقسات بەرىلەدى.
مەيرامحانالارعا، دامحانالارعا، بارلارعا، اسحانالارعا جانە باسقا دا قوعامدىق تاماقتانۋ نىساندارىنا "تۇتىنۋشىلارعا جەتكىزىپ بەرۋ" رەجيمى بويىنشا ساعات 10.00-دەن 22.00-گە دەيىن جۇمىس ىستەۋگە رۇقسات ەتىلەدى.
ال، ءىرى ساۋدا ۇيلەرى، ويىن-ساۋىق ورتالىقتارىنىڭ، بازارلاردىڭ، بارلىق ازىق-تۇلىك ەمەس تاۋارلار ساۋدا نىساندارىنىڭ، اۆتوسالونداردىڭ، اۆتوقوسالقى بولشەكتەر ساتۋ سالوندارىنىڭ، گۇل پاۆيلوندارىنىڭ قىزمەتى توقتاتىلادى.
حالىقتىڭ جاپپاي جينالاتىن ورىندارىنا، ونىڭ ىشىندە ساياباقتارعا، سكۆەرلەرگە، جاعالاۋلارعا، الاڭدارعا، بالالاردىڭ ويىن الاڭدارىنا جانە قالا تۇرعىندارىنىڭ وزگە دە دەمالىس ورىندارىنا بارۋىنا تىيىم سالىنادى.
بارلىق قىزمەت تۇرلەرىن كورسەتۋ ورىندارى، بانك بولىمشەلەرى جانە لومباردتار، "قازپوچتا" اق بولىمشەلەرى، قوناق ۇيلەر، سونداي-اق دوڭگەلەك مونتاجداۋعا ارنالعان جەكە تۇرعان بوكستار جۇمىس ىستەيدى.
قالا تۇرعىندارىن كارانتين كەزىندە بارلىق ساقتىق شارالارىن ۇستانىپ، ۇيلەرىڭىزدە قالۋعا شاقىرامىن.
"ادىرنا" ۇلتتىق پورتالى
