الەۋمەتتىك زەرتتەۋ: "73% قازاقستاندىق وتباسىن ءومىردىڭ ءمانى رەتىندە كورەدى"

1344

15 مامىر - حالىقارالىق وتباسى كۇنى. وسىعان بايلانىستى قازاقستاندىق قوعامدىق دامۋ ينستيتۋتى «رۋحاني جاڭعىرۋ»  وتباسى ينستيتۋتىن زەرتتەۋ ورتالىعى قازاقستاندىق كوپ بالالى وتباسىلاردىڭ جاعدايىن جانە دامۋىن زەرتتەۋ ناتيجەلەرىن جاريا ەتتى.

«ءسىز ءۇشىن وتباسى نەنى بىلدىرەدى؟» دەگەن سۇراققا، سۇرالعان قازاقستاندىقتاردىڭ جالپى سانىنىڭ 73,1%-ى وتباسىن ءومىردىڭ ءمانى رەتىندە سانايتىنىن ايتقان. سونداي-اق تانىمال جاۋاپتار: 39% – «اۋلەتتىڭ ەرتەڭى»، 29% – «باقىت پەن ماحاببات»، 16,9% – «جاۋاپكەرشىلىك پەن مىندەتتەمەلەر»، 7,9% – «قوعامنىڭ نەگىزى» جانە 1,6% – «جالعىزدىقتان قۇتقارۋ» دەپ جاۋاپ بەردى.

ايەلدەردىڭ 75,1%-ى جانە ەرلەردىڭ 51,3%-ى وتباسىن اۋلەتتىڭ ەرتەڭى دەپ سانايدى ەكەن.

«اتا-انالاردىڭ 69,3%-ى «ولار كوپ بالالى بولعىسى كەلدى مە؟» دەگەن سۇراققا، «ءيا، مەن ارقاشان كوپ بالالى بولعىم كەلدى» دەپ جاۋاپ بەردى. سۇرالعان مىڭداعان رەسپوندەنتتەردىڭ 65,2%-ى ءتورت بالانى تاربيەلەۋدە، 34,8% – بەس جانە ودان دا كوپ بالانى تاربيەلەۋدە»، - دەپ اتاپ ءوتتى وتباسى ينستيتۋتىن زەرتتەۋ ورتالىعىنىڭ جەتەكشىسى جۇلدىز باتتالوۆا.

وتباسىلىق جۇپتاردىڭ كوپشىلىگى (78,9%) وزدەرىنىڭ وتباسىلىق قارىم-قاتىناستارىن «وتە جاقسى، ءبىز ءبىر-ءبىرىمىزدى سۇيەمىز جانە قۇرمەتتەيمىز» دەپ باعالاپتى.

زەرتتەۋدە كوپ ادام وتباسىلىق قاتىناستاردى نىعايتاتىن ماڭىزدى ساپا ماحابباتتان گورى قۇرمەت دەپ كورسەتكەن. سۇرالعانداردىڭ 68,2% وسىلاي سانايدى. سونداي-اق، رەسپوندەنتتەر اراسىندا 90,2%-ى ومىرىنە  ريزا ەكەندىگىن اتاپ وتكەن، بۇل رەتتە، اجىراسقان ادامداردىڭ اراسىندا ومىرىنە ريزالىعىن 73,9%-ى ايتقان.

«70,4%-ى بالالاردى تاربيەلەۋدە كۇش قولدانۋعا تەرىس قارايدى، بۇل ورىندى ەمەس جانە دۇرىس ەمەس دەپ سانايدى. قازاقستاندىق اتا-انالار ءوزارا تۇسىنىستىك، قۇرمەت، ماحابباتتى جوعارى باعالاعان»، - دەدى جۇلدىز باتتالوۆا.

ايتا كەتۋ كەرەك، بۇل زەرتتەۋ قازاقستاندا العاش رەت وتكىزىلدى. زەرتتەۋ قورىتىندىسى بويىنشا وسى ماسەلەگە مۇددەلى مەملەكەتتىك ورگاندار مەن باسقا دا ۇيىمدار ءۇشىن ۇسىنىستار ازىرلەنەتىن بولادى.

ققدي «رۋحاني جاڭعىرۋ» وتباسى ينستيتۋتىن زەرتتەۋ ورتالىعى الەۋمەتتىك ينستيتۋت رەتىندە وتاندىق جانە حالىقارالىق تاجىريبەنى زەردەلەۋ، وتباسىنىڭ پروبلەمالىق اسپەكتىلەرىن شەشۋ بويىنشا ۇسىنىستاردى زەرتتەۋمەن، تالداۋمەن، ازىرلەۋمەن جانە قازاقستاندىق وتباسىلىق ساياساتتىڭ جاي-كۇيى تۋرالى جىل سايىنعى ۇلتتىق باياندامانى دايىنداۋ ءۇشىن ستاتيستيكالىق جانە الەۋمەتتىك دەرەكتەر بازاسىن قۇرۋمەن اينالىسادى.

"ەگەمەن قازاقستان"

پىكىرلەر
رەداكتسيا تاڭداۋى