Áleýmettik zertteý: "73% qazaqstandyq otbasyn ómirdiń máni retinde kóredi"

1362

15 mamyr - Halyqaralyq Otbasy kúni. Osyǵan baılanysty Qazaqstandyq qoǵamdyq damý ınstıtýty «Rýhanı jańǵyrý»  otbasy ınstıtýtyn zertteý ortalyǵy qazaqstandyq kóp balaly otbasylardyń jaǵdaıyn jáne damýyn zertteý nátıjelerin jarııa etti.

«Siz úshin otbasy neni bildiredi?» degen suraqqa, suralǵan qazaqstandyqtardyń jalpy sanynyń 73,1%-y otbasyn ómirdiń máni retinde sanaıtynyn aıtqan. Sondaı-aq tanymal jaýaptar: 39% – «áýlettiń erteńi», 29% – «baqyt pen mahabbat», 16,9% – «jaýapkershilik pen mindettemeler», 7,9% – «qoǵamnyń negizi» jáne 1,6% – «jalǵyzdyqtan qutqarý» dep jaýap berdi.

Áıelderdiń 75,1%-y jáne erlerdiń 51,3%-y otbasyn áýlettiń erteńi dep sanaıdy eken.

«Ata-analardyń 69,3%-y «olar kóp balaly bolǵysy keldi me?» degen suraqqa, «Iá, men árqashan kóp balaly bolǵym keldi» dep jaýap berdi. Suralǵan myńdaǵan respondentterdiń 65,2%-y tórt balany tárbıeleýde, 34,8% – bes jáne odan da kóp balany tárbıeleýde», - dep atap ótti otbasy ınstıtýtyn zertteý ortalyǵynyń jetekshisi Juldyz Battalova.

Otbasylyq juptardyń kópshiligi (78,9%) ózderiniń otbasylyq qarym-qatynastaryn «óte jaqsy, biz bir-birimizdi súıemiz jáne qurmetteımiz» dep baǵalapty.

Zertteýde kóp adam otbasylyq qatynastardy nyǵaıtatyn mańyzdy sapa mahabbattan góri qurmet dep kórsetken. Suralǵandardyń 68,2% osylaı sanaıdy. Sondaı-aq, respondentter arasynda 90,2%-y ómirine  rıza ekendigin atap ótken, bul rette, ajyrasqan adamdardyń arasynda ómirine rızalyǵyn 73,9%-y aıtqan.

«70,4%-y balalardy tárbıeleýde kúsh qoldanýǵa teris qaraıdy, bul oryndy emes jáne durys emes dep sanaıdy. Qazaqstandyq ata-analar ózara túsinistik, qurmet, mahabbatty joǵary baǵalaǵan», - dedi Juldyz Battalova.

Aıta ketý kerek, bul zertteý Qazaqstanda alǵash ret ótkizildi. Zertteý qorytyndysy boıynsha osy máselege múddeli memlekettik organdar men basqa da uıymdar úshin usynystar ázirlenetin bolady.

QQDI «Rýhanı jańǵyrý» Otbasy ınstıtýtyn zertteý ortalyǵy áleýmettik ınstıtýt retinde otandyq jáne halyqaralyq tájirıbeni zerdeleý, otbasynyń problemalyq aspektilerin sheshý boıynsha usynystardy zertteýmen, taldaýmen, ázirleýmen jáne Qazaqstandyq otbasylyq saıasattyń jaı-kúıi týraly jyl saıynǵy Ulttyq baıandamany daıyndaý úshin statıstıkalyq jáne áleýmettik derekter bazasyn qurýmen aınalysady.

"Egemen Qazaqstan"

Pikirler
Redakııa tańdaýy