اكىمدىكتەرگە كارانتينگە قارسى شارالاردى كۇشەيتۋدى تاپسىردى

پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن كوروناۆيرۋس تارالۋىنىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا ەل تۇرعىندارىنىڭ بەلگىلەنگەن كارانتيندىك رەجيمدى ساقتاۋىن باقىلاۋدى كۇشەيتۋ ماسەلەلەرى قارالدى، - دەپ حابارلايدى پرەمەر-ءمينيستردىڭ ءباسپاسوز قىزمەتىنە سىلتەمە جاساعان "ادىرنا". «بىرقاتار وڭىرلەردە اۋرۋ دەڭگەيىنىڭ ءوسۋى بايقالادى، بۇل ەڭ الدىمەن كارانتيندىك شارالاردىڭ ساقتالماۋىمەن بايلانىستى. مەملەكەت باسشىسىنىڭ تاپسىرمالارىن ورىنداۋ ءۇشىن وڭىرلەر سانيتارلىق-ەپيدەميولوگيالىق تالاپتاردىڭ ساقتالۋىن باقىلاۋدى كۇشەيتىپ، ازاماتتاردىڭ دا، ۇيىمداردىڭ دا، كاسىپورىنداردىڭ دا تالاپتارىن ورىنداۋى كەرەك»، - دەدى توعجانوۆ. وبلىستاردىڭ اكىمدىكتەرى مەن مەملەكەتتىك ورگاندارعا: - ەڭبەك ۇجىمدارىنداعى الەۋمەتتىك بايلانىستار دەڭگەيىن تومەندەتۋ (قىزمەتكەرلەردىڭ 50% -نان اسپاۋى كەرەك); - جۇمىس ۋاقىتىندا ماسكالاردىڭ ۋاقتىلى اۋىستىرىلۋىن باقىلاۋدى ۇيىمداستىرادى; الەۋمەتتىك قاشىقتىقتى ساقتاۋ ءۇشىن جاعداي جاسايدى; - قوعامدىق كولىكتەردىڭ تەك ورىندىقتار سانى بويىنشا وتىرۋىن باقىلاۋ، جولاۋشىلاردىڭ  تەك بەتپەردەمەن عانا كىرۋىن قامتاماسىز ەتۋ; - قوعامدىق ورىنداردا، كاسىپورىنداردا، ۇيىمدار مەن وبەكتىلەردە قورعانىس جانە ىشكى ىستەر قىزمەتكەرلەرىنىڭ قاتىسۋىمەن دەزينفەكتسيا شارالارىن كۇشەيتۋ. پرەمەر-ءمينيستردىڭ ءباسپاسوز قىزمەتى اتاپ وتكەندەي، وسى بۇيرىقتاردىڭ ورىندالۋىن ۇكىمەت تۇراقتى نەگىزدە قاداعالاپ وتىرادى.