كەشە «Nur Otan» پارتياسى شىمكەنت قالالىق فيليالىنىڭ توراعاسى، قالا اكىمى م.ايتەنوۆتىڭ قاتىسۋىمەن «Nur Otan» پارتياسى اكتيۆىنىڭ بەينەكونفەرەنتسيا ءماجىلىسى ءوتتى. جيىن بارىسىندا ەلباسى ن.نازارباەۆتىڭ باستاماسىمەن قۇرىلعان «Birgemiz» رەسپۋبليكالىق قوعامدىق قورىمەن اتقارىلىپ جاتقان جۇمىستار مەن قر پرەزيدەنتى ق.توقاەۆتىڭ توتەنشە جاعداي كەزىندە حالىقتى الەۋمەتتىك قولداۋ شارالارى، پارتيا توراعاسىنىڭ ءبىرىنشى ورىنباسارى ب.بايبەكتىڭ شىمكەنتكە جاساعان ءىسساپارىندا جانە قر پرەمەر-ءمينيسترى ا.ءماميننىڭ ازاماتتاردى قابىلداۋ كەزىندە بەرگەن تاپسىرمالارىنىڭ ورىندالۋ بارىسى تالقىلاندى.
ماجىلىستە ءسوز العان شىمكەنت قالاسى اكىمىنىڭ ورىنباسارى ن.ەرگەشبەك توتەنشە جاعداي كەزىندە كوممۋنالدىق قىزمەتتەردى جەتكىزۋشىلەردىڭ شىعىندارىن وتەۋگە 1,5 ملرد. تەڭگە قارجى قارالعانىن ايتتى.
«توتەنشە جاعداي كەزەڭىندە كوممۋنالدىق قىزمەتتەر شىعىندارىن وتەۋ بويىنشا بۇگىنگى تاڭعا 17 586 ازاماتتىڭ ءوتىنىمى ماقۇلدانىپ، مامىر ايىنا جوسپارلانعان 8 333 ازاماتقا تولەنگەن. قالعان وتىنىمدەر بويىنشا جۇمىس جۇرگىزىلۋدە»،-دەدى ن.ەرگەشبەك.
ۇكىمەت باسشىسى تاپسىرماسىنىڭ ورىندالۋ بارىسىن بايانداعان ءال-فارابي اۋدانى اكىمى ع.ماۋلەنقۇلوۆ قالاداعى №195 ورام تۇرعىندارى جىل سوڭىنا دەيىن ساپالى اۋىزسۋمەن قامتىلاتىنىن جەتكىزدى. اتالعان ورامدا ەلەكتر جەلىلەرىنىڭ قۇرىلىس-مونتاج جۇمىستارى تولىعىمەن اياقتالعان. ەندىگى كەزەكتە نىساندى ەلەكتر قۋاتىنا قوسۋ جانە ابونەنتتەۋ جۇمىستارى جۇرگىزىلۋدە.
ال، ورتكە ورانعان م.ۆودوپيانوۆا كوشەسىندەگى №1ا كوپقاباتتى ءۇيدىڭ قۇرىلىسى جونىندە اباي اۋدانىنىڭ اكىمى ب.پارمانوۆ مالىمدەدى.
ونىڭ ايتۋىنشا، توتەنشە جاعداي كەزىندە 42 وتباسى باسپاناسىز قالعان. مۇلدەم باسپاناسى بولماعان 22 وتباسى جاتاقحانامەن قامتىلىپ، قالعانى تۋىستارىنا جايعاستىرىلعان. ال 25 وتباسىعا 1 ملن تەڭگەدەي قارجىلاي كومەك كورسەتىلگەن. قازىر 5 قاباتتى تۇرعىن ءۇيدىڭ قۇرىلىسى جۇرگىزىلۋدە، قىركۇيەكتە تولىعىمەن پايدالانۋعا بەرىلەدى دەدى.
اكتيۆ وتىرىسىندا قاراتاۋ اۋدانىنىڭ اكىمى ا.الىقۇلوۆ «تاسكەن»، «ازات» شاعىناۋداندارىنداعى ينجەنەرلىك كوممۋنيكاتسيالىق جۇيەلەر قۇرىلىسىنىڭ بارىسىن ايتىپ ءوتتى.
اۋدان اكىمدەرىنىڭ بايانداماسىن تىڭداعان قالا باسشىسى اتقارىلىپ جاتقان جۇمىستاردىڭ ءوز مەرزىمىندە جانە ساپالى اياقتالۋىن قاتاڭ ەسكەرتتى.
بۇدان بولەك، جيىندا ءسوز العان «Nur Otan» پارتياسى شىمكەنت قالالىق فيليالى توراعاسىنىڭ ءبىرىنشى ورىنباسارى ب. نارىمبەتوۆ «BizBirgemiz» رەسپۋبليكالىق اكتسياسى مەن «Birgemiz» قوعامدىق قورى اياسىندا اتقارىلعان جۇمىستاردى باياندادى.
«Birgemiz» رەسپۋبليكالىق قوعامدىق قورىنان 40 مىڭنان اسا قالا تۇرعىنىنىڭ جەكە ەسەپشوتتارىنا 50 مىڭ تەڭگەدەن جالپى 2,8 ملرد تەڭگە قاراجات اۋدارىلدى. ال «BizBirgemiz» اكتسياسى اياسىندا 8 مىڭنان اسا وتباسى ازىق-تۇلىك جيىنتىعىمەن قامتاماسىز ەتىلدى جانە 1 ملن ماسكا تەگىن تاراتىلدى. قالاداعى سۋ باسۋ اپاتىنان زارداپ شەككەن «ەلتاي» ەلدىمەكەنىندەگى 60 وتباسىعا ازىق-تۇلىكپەن گيگيەنالىق زاتتار تاراتىلدى»،-دەدى ب.نارىمبەتوۆ.
ونىڭ ايتۋىنشا، «BizBirgemiz-ماقتاارال» اكتسياسى اياسىندا سۋ تاسقىنىنان زارداپ شەككەن ماقتاارال تۇرعىندارىنا شىمكەنت قالاسىنان 127 توننا ازىق-تۇلىك، گيگيەنالىق زاتتار، 5100 ازاماتقا اياق كيىم مەن توسەك ورىندار، 400 دانا كىلەم جونەلتىلگەن. 20 ءۇيدىڭ قۇرىلىسى جۇرۋدە. جالپى 81 ميلليون تەڭگە كولەمىندە قارجىلاي كومەك بەرىلدى.
قر پرەزيدەنتى ق.ك.توقاەۆتىڭ تاپسىرماسىمەن ازىرلەنگەن «جۇمىسپەن قامتۋدىڭ جول كارتاسى» باعدارلاماسىنىڭ ىسكە اسىرىلۋىنا پارتيالىق باقىلاۋ ورناتىلدى. باعدارلامانى جۇزەگە اسىرۋعا رەسپۋبليكا بويىنشا 1 ترلن.تەڭگە قارجى جوسپارلانىپ، ونىڭ ىشىندە شىمكەنت قالاسىنا 45,3 ملرد.تەڭگە ءبولىندى.
جوسپار بويىنشا 224 ينۆەستيتسيالىق جوبالاردا قالادا 8380 جۇمىس ورىندارى قۇرىلادى. بۇگىنگى كۇنگە 190 جوبادا 2 641 جۇمىس ورىندارى اشىلىپ، جۇمىسپەن قامتۋ ورتالىعى ارقىلى 1 036 ادام جۇمىسپەن قامتىلعان.
فيليال توراعاسى اتقارىلعان جۇمىستاردى قورىتىندىلاپ، پارتيا بەلسەندىلەرىنە ەلباسى تاپسىرمالارى مەن جۇكتەلگەن مىندەتتەردى ساپالى ءارى ۋاقتىلى ورىنداۋدى تاپسىردى. سونىمەن قاتار، «BizBirgemiz» رەسپۋبليكالىق اكتسياسى ارقىلى حالىقتىڭ الەۋمەتتىك از قورعالعان توبىنا ەرىكتى دەمەۋشىلىك كورسەتەتىن كاسىپكەرلەردى تارتا وتىرىپ، شىمكەنت قالاسىندا قايىرىمدىلىق جۇمىستارىن ودان ءارى جانداندىرۋ كەرەكتىگىن باسا ايتتى.
شىمكەنت
