پرەزيدەنت قاسىم-جومارت توقاەۆتىڭ ساياسي قۋعىن-سۇرگىن قۇرباندارىن ەسكە الۋ كۇنىنە وراي جاساعان ۇندەۋىن تىڭداپ، قاتتى تولقىدىم. توتاليتارلىق رەجيم ۇيىمداستىرعان قۋعىن-سۇرگىننىڭ ەڭ اۋىر سالدارىنىڭ ءبىرى - دەپورتاتسيا بولاتىن. جاۋىز ساياسي جۇيە كسرو اۋماعىنداعى از حالىقتارعا وتە كۇشتى قىسىم كورسەتتى. ءبىزدىڭ اتا-بابالارىمىز تۋعان جەرىنەن كۇشتەپ قونىس اۋدارىلىپ، قازاقستانعا جەر اۋدارىلعان. سول قيىن-قىستاۋ كەزەڭدە قازاق حالقى دەپورتاتسيالانعان ۇلت وكىلدەرىنە كوپ قامقورلىق جاساپتى.
قازاقتىڭ جاقسىلىعىن كورگەندەردىڭ ءبىرى – مەنىڭ اجەم بولىپتى. تۋعان جەرىنەن اجىراپ، ەركىنەن تىس جەر اۋدارىلعان بايعۇس اجەم كىشكەنتاي 6 بالاسىمەن بىرگە قىستىڭ قاقاعان ايازىندا ۆاگوننان ءتۇسىپ، دالادا قالعان. ايازدان ۇسۋگە اينالعان بالالارىنا قاراۋعا ءداتى بارماي، ءۇمىتى ۇزىلۋگە شاق قالعاندا ءبىر قايىرىمدى قازاق ازاماتى جولىعىپتى. ول بۇرسەڭ قاققان بالالاردى كورىسىمەن ۇستىندەگى تۇلىبىن شەشىپ، ولاردىڭ ۇستىنە جاۋىپتى. سودان اجەم قازاقتاردىڭ مەيىرىمىنە تالاي بولەنگەنىن ەرەكشە ىقىلاسپەن اڭگىمەلەپ بەرەتىن ەدى.
اجەم ۇستىندەگى تۇلىبىن شەشىپ بەرىپ، بالالارىن ۇسىك شالۋدان امان الىپ قالعان امانجول ەسىمدى كىسى تۋرالى ءجيى ايتىپ بەرەتىن ەدى. سوعىستان كەيىنگى قيىن جىلدارى وزدەرى دە جارىماي وتىرعانىنا قاراماي قازاقتار اجەمدى 6 بالاسىمەن ۇيىنە كىرگىزىپ الىپ، ءبىر ءۇزىم نانىن ءبولىپ بەرگەن ەكەن. سودان اجەمىز ءوز بالالارى مەن نەمەرەلەرىنە قازاقتارعا قاشان دا قۇرمەتپەن قاراۋدى وسيەت ەتىپ ايتۋمەن ءوتتى.
ءيا، سول داۋىردەگى اۋىرتپالىقتار بۇكىل قازاقستان حالقىنىڭ باسىنا تۇسكەن ناۋبەت ەدى. حالقىمىز ەندى ونداي زۇلماتقا ۇشىراماۋى ءۇشىن ءوز تاريحىمىزدى زەرتتەپ، ونى جادىمىزدا جاڭعىرتىپ وتىرۋىمىز وتە ورىندى. پرەزيدەنت ۇندەۋىنىڭ ءمانى، مىنە، وسىندا.
ساجدات احمەتوۆا،
شىمكەنت قالالىق شەشەن-ينگۋش ەتنومادەني بىرلەستىگىنىڭ ءتورايىمى
