Prezident Qasym-Jomart Toqaevtyŋ saiasi quǧyn-sürgın qūrbandaryn eske alu künıne orai jasaǧan Ündeuın tyŋdap, qatty tolqydym. Totalitarlyq rejim ūiymdastyrǧan quǧyn-sürgınnıŋ eŋ auyr saldarynyŋ bırı - deportasiia bolatyn. Jauyz saiasi jüie KSRO aumaǧyndaǧy az halyqtarǧa öte küştı qysym körsettı. Bızdıŋ ata-babalarymyz tuǧan jerınen küştep qonys audarylyp, Qazaqstanǧa jer audarylǧan. Sol qiyn-qystau kezeŋde qazaq halqy deportasiialanǧan ūlt ökılderıne köp qamqorlyq jasapty.
Qazaqtyŋ jaqsylyǧyn körgenderdıŋ bırı – menıŋ äjem bolypty. Tuǧan jerınen ajyrap, erkınen tys jer audarylǧan baiǧūs äjem kışkentai 6 balasymen bırge qystyŋ qaqaǧan aiazynda vagonnan tüsıp, dalada qalǧan. Aiazdan üsuge ainalǧan balalaryna qarauǧa dätı barmai, ümıtı üzıluge şaq qalǧanda bır qaiyrymdy qazaq azamaty jolyǧypty. Ol bürseŋ qaqqan balalardy körısımen üstındegı tūlybyn şeşıp, olardyŋ üstıne jauypty. Sodan äjem qazaqtardyŋ meiırımıne talai bölengenın erekşe yqylaspen äŋgımelep beretın edı.
Äjem üstındegı tūlybyn şeşıp berıp, balalaryn üsık şaludan aman alyp qalǧan Amanjol esımdı kısı turaly jiı aityp beretın edı. Soǧystan keiıngı qiyn jyldary özderı de jarymai otyrǧanyna qaramai qazaqtar äjemdı 6 balasymen üiıne kırgızıp alyp, bır üzım nanyn bölıp bergen eken. Sodan äjemız öz balalary men nemerelerıne qazaqtarǧa qaşan da qūrmetpen qaraudy ösiet etıp aitumen öttı.
İä, sol däuırdegı auyrtpalyqtar bükıl Qazaqstan halqynyŋ basyna tüsken näubet edı. Halqymyz endı ondai zūlmatqa ūşyramauy üşın öz tarihymyzdy zerttep, ony jadymyzda jaŋǧyrtyp otyruymyz öte oryndy. Prezident Ündeuınıŋ mänı, mıne, osynda.
Sajdat AHMETOVA, Şymkent qalalyq şeşen-inguş etnomädeni bırlestıgınıŋ töraiymy
