بىرنەشە كۇن بۇرىن تۇركىستان وبلىسىنىڭ حيرۋرگ-دارىگەرى الەۋمەتتىك جەلىدە وتا جاساۋعا ارنالعان قولعاپتاردىڭ ساپاسى تىم ناشار ەكەنىن جاريالاعان ەدى. قازىر سول قايرات سەيدۋاليەۆ ەسىمدى دارىگەردىڭ جۇمىستان قۋىلعانى بەلگىلى بولىپ وتىر. بۇل تۋرالى "Otyrar news" حابارلادى.
تۇركىستان وبلىسى، كەلەس اۋدانىنىڭ ورتالىعى ابايداعى اۋداندىق اۋرۋحاناسىندا قىزمەت ەتەتىن حيرۋرگ-دارىگەر قايرات سەيدۋاليەۆ وتا جاساۋعا بەرىلگەن قولعاپتىڭ ساپاسىز ەكەنىن ايتىپ، ونى كيمەك بولىپ الەكتەنگەن ءساتىن ۆيدەوعا ءتۇسىرىپ، الەۋمەتتىك جەلىگە جۇكتەگەن.
"قازنەتتە" قىزۋ تالقىلانعان بۇل ۆيدەودان سوڭ اۋرۋحانا قىزمەتكەرى جۇمىستان بوساتىلعان.
دارىگەر 8 جىل بۇرىن "ديپلوممەن اۋىلعا" باعدارلاماسىمەن جۇمىسقا كەلگەن. وعان قوسا 7 جىل بويى حيرۋرگيا ءبولىمىنىڭ مەڭگەرۋشىسى بولعان. 33 جاستاعى دارىگەردىڭ ايتۋىنشا، 2020 جىلدىڭ اقپانىندا جاڭا باسشىلىق تاعايىندالعالى بەرى ونى سەبەپسىز قۋدالاۋمەن قاتار، مەديتسينالىق قۇرال-جابدىقتارعا تاپشىلىق جيىلەپ كەتكەن.
قايرات سەيدۋاليەۆ، حيرۋرگ-دارىگەر:
«ساپاسى جاعىنان وتە تومەن، ءتىپتى تالاپقا ساي ەمەس قولعاپتاردىڭ جارامسىز ەكەنىن كورسەتكەنىم ءۇشىن اۋرۋحانا باسشىلىعى – باس دارىگەرى، باس دارىگەردىڭ ورىنباسارى، كادر ءبولىمىنىڭ باسشىسى، زاڭگەرى، اۋرۋحانانىڭ كاسىپوداق توراعاسى، سونداي-اق ولاردىڭ مۇشەلەرى – 10 شاقتى ادام ماعان قارسى حاتتاما جاساپ، مەنى بۇيرىقپەن جۇمىستان بوساتتى. بۇيرىقتى قولىما 3 مينۋتتىڭ ىشىندە اكەپ بەردى. مەن اۋرۋحانا باسشىلارىنان ماتەريالدىق كومەك سۇراعان جوقپىن، كوروناۆيرۋس پاندەمياسىنان قورعانۋ ءۇشىن ساپالى قولعاپ سۇرادىم. ءوزىم قاراپايىم دارىگەرمىن، سوندا اقشاسى جوق، تانىسى جوق، تۋىسى جوق دارىگەرلەر وسىنداي قىسىمعا ۇشىراي بەرۋى كەرەك پا؟ ادىلدىك قايدا؟ زاڭ قايدا؟».
ال اۋرۋحانانىڭ باس دارىگەرى قىزمەتكەرىنىڭ جۇمىستان بوساتىلۋىنا بىرنەشە سەبەپ بولدى دەپ وتىر. ايتۋىنشا، دارىگەر جالعان اقپارات تاراتقان. وعان قوسا ناۋقاستار تاراپىنان تۇسكەن ارىزعا بايلانىستى ارنايى كوميسسيا ونى جۇمىستان شىعارۋعا ءماجبۇر بولىپتى.
ايدا بەكسۇلتانوۆا، «اباي» كەلەس اۋداندىق اۋرۋحاناسىنىڭ باس دارىگەرى:
«قايرات سەيدۋاليەۆ ەمحانادا قولعاپتاردىڭ ءتۇرلى ولشەمدەرى بولسا دا ەمحانا مەڭگەرۋشىسى مەن اعا مەيىربيكەدەن سۇراماي، ءوزىنىڭ جەڭىل مىنەزىمەن بىزگە جالا جاۋىپ، الەۋمەتتىك جەلى ارقىلى تاراتىپ جىبەرگەن. وعان قوسا ول 2020 جىلدىڭ اقپان ايىندا ءتارتىپ ساقتاماعانى ءۇشىن ەسكەرتۋ الدى. 2020 جىلدىڭ 30 ناۋرىزىندا بۇل دارىگەردىڭ ۇستىنەن ناۋقاستى قاراماي، 3 ساعات كولەمىندە كومەك كورسەتىلمەگەنى تۋرالى ارىز تۇسكەن».
كوميسسيانىڭ مۇنداي شەشىمىمەن كەلىسپەگەن حيرۋرگ ەندى دەنساۋلىق ساقتاۋ باسقارماسىنىڭ باسشىلىعى مەن باس دارىگەردى ءوزىن جالعان جالامەن جۇمىستان قۋدى دەپ پرەزيدەنتكە ارىزدانۋعا بەكىنىپ وتىر.
"ادىرنا" ۇلتتىق پورتالى
