تۇركىستاندا رەسپۋبليكا كۇنىنە وراي مەملەكەتتىك تۋدى كوتەرۋ ءراسىمى ءوتتى

تۇركىستانداعى «رامىزدەر» الاڭىندا 25 قازان – رەسپۋبليكا كۇنىنە ارنالعان مەملەكەتتىك تۋدى كوتەرۋ سالتاناتى ءوتتى. ءىس-شارا قازاقستان رەسپۋبليكاسىنىڭ مەملەكەتتىك ءانۇرانىن ورىنداۋدان باستالىپ، كوك بايراق جەلبىرەدى.

سالتاناتتى جيىنعا تۇركىستان وبلىسىنىڭ اكىمى نۇرالحان كوشەروۆ، ءوڭىردىڭ قۇرمەتتى ازاماتتارى، جاستار جانە قالا تۇرعىندارى قاتىستى. مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدىڭ بارلىق وڭىرىندە رەسپۋبليكا كۇنىنە ارنالعان مەملەكەتتىك تۋدى كوتەرۋ ءراسىمى داستۇرگە اينالعان. سول يگى باستاما قاسيەتتى تۇركىستان تورىندە دە جالعاسىن تاپتى. 

– بارشاڭىزدى 25 قازان – رەسپۋبليكا كۇنىمەن شىن جۇرەكتەن قۇتتىقتايمىن! مەملەكەت باسشىسى قاسىم-جومارت توقاەۆ رەسپۋبليكا كۇنىنە ۇلتتىق مەرەكە مارتەبەسىن قايتارۋ تۋرالى باستاما كوتەرىپ، ول جۇزەگە استى. جىل سايىن رەسپۋبليكا كۇنى پرەزيدەنتىمىز تۋ كوتەرۋ ءراسىمىن وتكىزەدى. بۇل ءىس-شارا رەسپۋبليكانىڭ بارلىق وڭىرىندە ءوز جالعاسىن تابادى. مىنە، بۇگىن وسى ماقساتتا وزدەرىڭىزبەن تۇركىستان تورىندە جۇزدەسىپ تۇرمىز. بيىل 1990 جىلى 25 قازاندا قابىلدانعان دەكلاراتسياعا بيىل 35 جىل تولىپ وتىر. بۇل دەكلاراتسيا ەلىمىزدىڭ تاۋەلسىزدىك الۋىنا جول اشقان ماڭىزدى قۇجات بولدى. بۇگىندە تاۋەلسىز ەلىمىز تۇراقتى دامىپ كەلەدى. ەلدىگىمىز ماڭگى بولسىن! كوك بايراعىمىز ءاردايىم كوكتە جەلبىرەپ، ەلىمىزدىڭ مارتەبەسى بيىكتەي بەرسىن! – دەدى وبلىس اكىمى نۇرالحان كوشەروۆ.

تۇركىستاندىقتار بۇل مەرەكەنى جوعارى دەڭگەيدە اتاپ ءوتىپ، مەملەكەتتىك رامىزدەردى قۇرمەت تۇتۋ ءداستۇرىن جالعاستىردى. مەرەكەلىك شارا اياسىندا كونتسەرتتىك باعدارلاما ۇيىمداستىرىلىپ، وتانسۇيگىشتىككە تاربيەلەيتىن اندەر شىرقالدى. 

ايتا كەتەيىك، تۇركىستانداعى تۋ تۇعىرىنىڭ بيىكتىگى – 62,5 مەتر، بايراقتىڭ ەنى –12 مەتر، ۇزىندىعى – 24 مەتر. 

مەملەكەتتىك تۋ – ەلدىكتىڭ بەلگىسى، ازاتتىقتىڭ ايبارى. مەملەكەتتىك رامىزدەردى قاستەرلەۋ – وتانشىلدىقتىڭ كورىنىسى.