تۇركىستان وبلىسىندا ەرەكشە كۇتىمدى قاجەت ەتەتىن تۇرعىندارعا مەملەكەتتىك قولداۋ كورسەتىلۋدە

تۇركىستان وبلىسىندا حالىقتىڭ الەۋمەتتىك جاعدايىن جاقسارتۋ، قوعامنىڭ ءار ساناتىنداعى توپتارىنا جان-جاقتى قولداۋ كورسەتۋ جۇمىستارى كۇشەيتىلگەن. وبلىس اكىمى نۇرالحان كوشەروۆتىڭ توراعالىعىمەن وتكەن ماجىلىستە مۇگەدەكتىگى بار ادامداردىڭ الەۋمەتتىك قورعالۋى باعىتىنداعى جۇمىستار سارالانىپ، ماسەلەلەر تالقىلاندى. ءوڭىر باسشىسى جاۋاپتى باسقارما مەن اۋدان، قالا اكىمدىكتەرىنە تۇرعىنداردى الەۋمەتتىك قولداۋ ءىسىن جانداندىرا ءتۇسۋدى تاپسىردى.

– مۇگەدەكتىگى بار تۇرعىندارعا مەملەكەت تاراپىنان كورسەتىلەتىن كومەك ساپالى ءارى جۇيەلى بولۋى ءتيىس. جاۋاپتى باسقارما مەن اۋدان، قالالارداعى وسى سالاعا جەتەكشىلىك ەتەتىن باسشىلار ءوز مىندەتتەرىن تالاپقا ساي اتقارۋى كەرەك. بۇل ماسەلە قاتاڭ باقىلاۋدا بولادى، – دەدى نۇرالحان كوشەروۆ.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ مىندەتىن اتقارۋشى الماس ابدىقادىروۆتىڭ ايتۋىنشا، وبلىستا 101 930 مۇگەدەكتىگى بار ادام ەسەپتە تۇر. 2021 جىلدان باستاپ مۇگەدەكتىگى بار ادامدارعا الەۋمەتتىك قورعاۋ شارالارى «الەۋمەتتىك قىزمەتتەر پورتالى» ارقىلى كورسەتىلىپ، وڭالتۋ جانە ابيليتاتسيالاۋ ءۇشىن قاجەتتى تاۋارلار مەن قىزمەتتەردى جەتكىزۋشىلەردى ءوز بەتىنشە تاڭداۋعا مۇمكىندىك بەرىلىپ، الەۋمەتتىك قىزمەتتەردى الۋ پروتسەسى جەڭىلدەتىلگەن.

ال 2025 جىلدان باستاپ ساناتوريلىك-كۋرورتتىق ەمدەۋ شارالارى مەن مىندەتتى گيگيەنالىق تاۋارلاردى، ىمداۋ ءتىلى مامانى، جەكە كومەكشى قىزمەتىن الۋعا وتىنىشتەر پرواكتيۆتى تۇردە قابىلدانۋدا. ناتيجەسىندە ءوتىنىش بەرۋشىلەر سانى بىلتىردىڭ وسى كەزەڭىمەن سالىستىرعاندا 17,5 پايىزعا نەمەسە 62 628 وتىنىشتەن 75 898 وتىنىشكە ۇلعايعان.

2024 جىلدىڭ قورىتىندىسىمەن وڭالتۋ باعدارلاماسى 95 پايىزعا ورىندالىپ، 66 860 ءوتىنىش قاناعاتتاندىرىلدى. بۇل ماقساتتا 17,1 ملرد تەڭگە قارجى جۇمسالدى. بيىلعى 3-ءشى توقساننىڭ قورىتىندىسىمەن ابيليتاتسيالاۋ مەن وڭالتۋدىڭ جەكە باعدارلاماسىنا سايكەس وڭالتۋ قۇرالدارى مەن ارناۋلى الەۋمەتتىك قىزمەتتەرگە 75898 ءوتىنىش قابىلدانىپ، 55502 ءوتىنىش قاناعاتتاندىرىلعان. مىندەتتى گيگيەنالىق قۇرالدارمەن قامتۋعا 2025 جىلى بيۋدجەتتىڭ بارلىق كوزىنەن 6,8 ملرد تەڭگە قارالعان.