Türkıstan oblysynda erekşe kütımdı qajet etetın tūrǧyndarǧa memlekettık qoldau körsetılude

Türkıstan oblysynda halyqtyŋ äleumettık jaǧdaiyn jaqsartu, qoǧamnyŋ är sanatyndaǧy toptaryna jan-jaqty qoldau körsetu jūmystary küşeitılgen. Oblys äkımı Nūralhan Köşerovtıŋ töraǧalyǧymen ötken mäjılıste mügedektıgı bar adamdardyŋ äleumettık qorǧaluy baǧytyndaǧy jūmystar saralanyp, mäseleler talqylandy. Öŋır basşysy jauapty basqarma men audan, qala äkımdıkterıne tūrǧyndardy äleumettık qoldau ısın jandandyra tüsudı tapsyrdy.

– Mügedektıgı bar tūrǧyndarǧa memleket tarapynan körsetıletın kömek sapaly ärı jüielı boluy tiıs. Jauapty basqarma men audan, qalalardaǧy osy salaǧa jetekşılık etetın basşylar öz mındetterın talapqa sai atqaruy kerek. Būl mäsele qataŋ baqylauda bolady, – dedı Nūralhan Köşerov.

Oblystyq jūmyspen qamtudy üilestıru jäne äleumettık baǧdarlamalar basqarmasy basşysynyŋ mındetın atqaruşy Almas Äbdıqadyrovtyŋ aituynşa, oblysta 101 930 mügedektıgı bar adam esepte tūr. 2021 jyldan bastap mügedektıgı bar adamdarǧa äleumettık qorǧau şaralary «Äleumettık qyzmetter portaly» arqyly körsetılıp, oŋaltu jäne abilitasiialau üşın qajettı tauarlar men qyzmetterdı jetkızuşılerdı öz betınşe taŋdauǧa mümkındık berılıp, äleumettık qyzmetterdı alu prosesı jeŋıldetılgen.

Al 2025 jyldan bastap sanatoriilık-kurorttyq emdeu şaralary men mındettı gigienalyq tauarlardy, ymdau tılı mamany, jeke kömekşı qyzmetın aluǧa ötınışter proaktivtı türde qabyldanuda. Nätijesınde ötınış beruşıler sany byltyrdyŋ osy kezeŋımen salystyrǧanda 17,5 paiyzǧa nemese 62 628 ötınışten 75 898 ötınışke ūlǧaiǧan.

2024 jyldyŋ qorytyndysymen oŋaltu baǧdarlamasy 95 paiyzǧa oryndalyp, 66 860 ötınış qanaǧattandyryldy. Būl maqsatta 17,1 mlrd teŋge qarjy jūmsaldy. Biylǧy 3-şı toqsannyŋ qorytyndysymen abilitasiialau men oŋaltudyŋ jeke baǧdarlamasyna säikes oŋaltu qūraldary men arnauly äleumettık qyzmetterge 75898 ötınış qabyldanyp, 55502 ötınış qanaǧattandyrylǧan. Mındettı gigienalyq qūraldarmen qamtuǧa 2025 jyly biudjettıŋ barlyq közınen 6,8 mlrd teŋge qaralǧan.