بۇگىن اقپاراتتىق-كوممۋنيكاتسيالىق ورتالىعىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، شىمكەنت قالاسىنىڭ باس مەملەكەتتىك سانيتاريالىق دارىگەرى ءابدىماناپ تولەباەۆ جانە شىمكەنت قالالىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشىسى تيميرحان ۆارزيلوۆتىڭ قاتىسۋىمەن قالاداعى ەپيدەميولوگيالىق جاعداي بويىنشا بريفينگ ءوتتى.
ءباسپاسوز ماجىلىسىندە، ەڭ الدىمەن، ءسوز تىزگىنىن العان شىڭعىس جۇمابەكۇلى قالاداعى قالىپقا تۇسە باستاعان ەپيدەميولوگيالىق احۋالدى تۇراقتى جاعدايدا ۇستاۋ ءۇشىن جوسپارلارى جونىندە ءسوز قوزعادى.
– كوروناۆيرۋس ينفەكتسياسىنىڭ كەڭ تارالۋىن الدىن الۋ ماقساتىندا قالادا ادامدار كوپ شوعىرلاناتىن قوعامدىق ورىندارعا ناسيحات باننەرلەرىن ىلەمىز. ياعني، حالىق سانيتارلىق نورمالاردىڭ ساقتالۋىن جادىلارىنان شىعارماۋى كەرەك. ماسەلەن، بۇگىندە بەتپەردە ادامنىڭ كيەتىن كيىمى سەكىلدى قاجەتتىلىككە اينالدى. وسى قالىپتى ءالى دە ساقتاۋىمىز كەرەك. ويتكەنى ىندەت ۇيىتقىپ وتىرىپ قايتا سوعۋى مۇمكىن. ال ول ۆيرۋسپەن كۇرەس كوزبەن كورىنبەيتىن جۇمىس سياقتى. بۇل ءسوزىمدى مەديتسينا ماماندارىنىڭ ەڭبەگىن نازارعا الىپ ايتىپ وتىرمىن. ءوز كەزەگىندە ءبىز شىمكەنت قالاسىنىڭ اكىمدىگى اق حالاتتىلار كاسىبيلىگىن سارقىپ جۇمىس ىستەۋگە جاعداي جاساۋىمىز قاجەت، – دەدى ش.مۇقان.
سونداي-اق، قالا اكىمىنىڭ ءبىرىنشى ورىنباسارى جەكە جوسپار جوق، مەملەكەتتىك ماقسات بار ەكەنىن ايتا كەلە، «بۇگىنگى جاعداي قالىپقا كەلدى دەپ، وعان نەمقۇرايلى قاراساق، ءۇشىنشى تولقىن بولۋى ابدەن مۇمكىن. ول – قاراپايىم شىندىق. ەپيدەميولوگيا كەشە پايدا بولعان جوق، ول – عىلىم، زەرتتەلگەن دۇنيە. ياعني، ساقتانباساق، ىندەتتى قايتا ءورشىتىپ الۋىمىز مۇمكىن. دەگەنمەن الەم عالىمدارى بۇل ۆيرۋستى اۋىزدىقتاۋ ءۇشىن كۇرەسۋدە. بۇگىندە دۇنيە جۇزىندە عالىمدار 160-تان اسا ۆاكتسينانى سىناقتان وتكىزىپ جاتىر. ونىڭ ىشىندە ەكى ۆاكتسينانى ەلىمىزدىڭ عالىمدارى سىناقتان وتكىزۋدە» دەپ، ءسوزىن تۇيىندەدى ش.جۇمابەكۇلى.
بريفينگتە شىمكەنت قالاسىنىڭ باس مەملەكەتتىك سانيتاريالىق دارىگەرى كاسىپكەرلىك نىسان يەلەرىنەن سانيتارلىق نورمالاردى ساقتاۋعا شاقىردى.
– ماقساتىمىز ايىپپۇل ءوسىمىن كوبەيتۋ ەمەس، بىراق كاسىپكەرلىك نىسان يەلەرى تالاپقا ساي جۇمىس ىستەمەسە، شارا قولدانامىز. بۇل رەتتە ەپيدەميولوگيالىق احۋال كەزىندەگى قالامىزداعى دارىحانالارعا جۇرگىزىلگەن مونيتورينگ بويىنشا ايتسام، 457-ءى دارىحاناعا تەكسەرۋ جۇرگىزىلدى. ولاردىڭ 87-سىنەن زاڭ تالاپتارىن بۇزۋ انىقتالىپ، ايىپپۇل سالىندى. جانە ولاردىڭ 27-ءسى سوتقا جولدانىپ، بۇگىندە 8-نە تەرگەۋ جۇمىستارى جۇرگىزىلۋدە، – دەدى ءا.تولەباەۆ.
ءابدىماناپ قوشقارۇلىنىڭ سوزىنە سۇيەنسەك، كوروناۆيرۋس ينفەكتسياسىنا بايلانىستى شەكتەۋ شارالارى كەزىندە قالادا وسى جىلى وزگە دە ينفەكتسيالىق اۋرۋلار (وبا، تىرىسقاق، قۇتىرۋ، پاراتيف، ديفتەريا، كوكجوتەل، قىزامىق، ءىش سۇزەگى، پوليوميەليت، سالمونەللەز) تىركەلمەگەن.
ءوز كەزەگىندە تيميرحان يسابالۇلىنىڭ ايتۋىنشا، شىمكەنت قالاسىندا 2020 جىلعى 5 تامىزداعى جاعداي بويىنشا 5025 covid-19 جاعدايى تىركەلگەن. ونىڭ ىشىندە سيمپتومدىق – 2572, سيمپتومسىز – 2453. ال وتكەن تاۋلىكتە 14 ادام ۆيرۋس جۇقتىرعان.
شىمكەنت اقپاراتتىق-كوممۋنيكاتسيالىق ورتالىعى
فوتو – س.قوساي
